ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ”އެމް.އެން.ޔޫ.އެސް.ޔޫ ބަހުސް މުބާރާތް 2022″ގެ ގްރޫޕް ސްޓޭޖުގައި ކުރެވުނު 3 ބަހުސްވެސް ކާމިޔާބުކޮށް އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) އަދި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) މުބާރާތުގެ ސެމީ ފައިނަލަށް ދަތުރުކޮށްފިއެވެ.
14 ސެޕްޓެންބަރު ވީ ބުދަ ދުވަހުގެރޭ ކުރިއަށްދިޔަ ފުރަތަމަ ބަހުސް އައި.ޔޫ.އެމް އިން ކާމިޔާބު ކުރީ 706 – 526ގެ ނަތީޖާއަކުން ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް)ގެ މައްޗަށް ކުރިހޯދައިގެންނެވެ. ’ދިވެހި ޤައުމިއްޔަތު ދެމެހެއްޓުމުގެ އެންމެ ބޮޑު ދައުރެއް އޮތީ ފަރުދުންގެއެވެ.“ މި މައުޟޫއަށް ކުރި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވުނީ މައުޟޫއާ އެއްކޮޅަށް ބަހުސްކުރި ސީ.އެފް.އެސްގެ ހަމްދާ ހަމީދެވެ.
ހަމަ އެރޭ ކުރިއަށް ދިޔަ ދެވަނަ ބަހުސް އެފް.އެސް.އެލް އިން ކާމިޔާބުކުރީ ފެކަލްޓީ އޮފް އާރޓްސް (އެފް.އޭ)ގެ މައްޗަށް ކުރި ހޯދައިގެންނެވެ. މި ބަހުސްގެ ކުރިން ކުރެވުނު 2 ބަހުސް 2 ޓީމުންވެސް ވަނީ ކާމިޔާބުކޮށްފައެވެ. އެހެންކަމުން މި ބަހުސް އަކީ ގްރޫޕްގެ އެއްވަނަ ހޯދުމަށް ކޮންމެހެންވެސް ކާމިޔާބު ކުރަން ޖެހިފައި އޮތް ބަހުސް އެކެވެ. ”ދިވެހިރާއްޖޭގެ އިޤްތިޞާދު ހަރުދަނާ ކުރުމަށްޓަކައި ޓެކްސް ނަގާ މިންވަރު އިތުރު ކުރަން“ ނުޖެހޭ ކަމަށް ވަކާލާތު ކުރަމުން އެފް.އެސް.އެލް އިން ބަހުސް ކާމިޔާބު ކުރީ 891 – 779ގެ ނަތީޖާ އަކުންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އެސް.އެލްގެ އިސްމާޢީލް ރަޒީން އިމްރާނެވެ. މި ބަހުސް އިން ބަލިވި ކަމުގައިވިޔަސް، ގްރޫޕްގެ ދެވަނައިގެ ގޮތުގައި އެފް.އޭ ވަނީ ސެމީ ފައިނަލަށް ދަތުރުކޮށްފައެވެ.
ސެމީ ފައިނަލުގައި އެފް.އެސް.އެލް އިން ބައްދަލުކުރާނީ އަނެއް ގްރޫޕްގެ ދެވަނަ ފެކަލްޓީ އޮފް އެޑިއުކޭޝަނާއެވެ. އަދި އެފް.އޭ އިން ބައްދަލުކުރާނީ އެ ގްރޫޕްގެ އެއްވަނަ އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް)އާއެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 9 ވަނަ މުބާރާތެވެ.
