ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ”އެމް.އެން.ޔޫ.އެސް.ޔޫ ބަހުސް މުބާރާތް 2022″ގެ ސެމީ ފައިނަލަށް ފެކަލްޓީ އޮފް އެޑިއުކޭޝަން (އެފް.އީ) ދަތުރުކުރިއިރު، ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް) އިން ފެކަލްޓީ އޮފް ހެލްތު ސައިންސަސް (އެފް.އެޗް.އެސް)ގެ މައްޗަށް ކުރިހޯދައިފިއެވެ.
14 ސެޕްޓެންބަރު ވީ ބުދަ ދުވަހުގެރޭ ކުރިއަށްދިޔަ ދެވަނަ ބަހުސް އެފް.އީ އިން ކާމިޔާބު ކުރީ 824 – 798ގެ ނަތީޖާއަކުން އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް)ގެ މައްޗަށް ކުރިހޯދައިގެންނެވެ. މި ބަހުސްގެ މައުޟޫއަކީ ”ބޯހިޔާވަހިކަމުގެ މައްސަލަ ހައްލުކުރުމަށް ގޯތިދިނުން ހުއްޓާލަން ޖެހެއެވެ.“ ކަމަށްވާއިރު، މި ބަހުސްގައި އެފް.އީ އިން ބަހުސްކުރީ މައުޟޫއާ އެއްކޮޅަށެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެމް.އެން.ޔޫ.ބީ.އެސްގެ އަނޫފާ ޢަލީ އެވެ. މި ނަތީޖާއާއެކު، އެފް.އީ އަށް ގްރޫޕްގެ ދެވަނަ ލިބި ސެމީއަށް ދަތުރުކުރިއިރު، ގްރޫޕްގެ 3 ވަނަ އަށް ވެއްޓި އެމް.އެން.ޔޫ.ބީ.އެސް ވަނީ މުބާރާތުން ކަޓާފައެވެ.
ހަމަ އެރޭ ކުރިއަށް ދިޔަ ހަތަރު ވަނަ ބަހުސްގައި އެފް.އެޗް.ޓީ.އެސް އިން އެފް.އެޗް.އެސްގެ މައްޗަށް ކުރިހޯދީ 675 – 626ގެ ނަތީޖާ އަކުންނެވެ. މި ބަހުސްގެ މައުޟޫ އަކީ ”ދިވެހިރާއްޖޭގެ ދަތުރުފަތުރުގެ ނިޒާމު ހަރުދަނާކުރުމަށް އިތުރު އެއާޕޯޓް އެޅުން މުހިއްމެވެ.“. މި ބަހުސްގައި އެފް.އެޗް.ޓީ.އެސް އިން ބަހުސްކުރީ މައުޟޫއާ ދެކޮޅަށް ކަމަށްވާއިރު، އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެ ފެކަލްޓީގެ އިސްމާޢީލް އަހުފަލް އެވެ. މި ނަތީޖާއާއެކު އެފް.އެޗް.ޓީ.އެސް އަށް ގްރޫޕްގެ 3 ވަނަ ލިބުނުއިރު، އެފް.އެޗް.އެސް ދިޔައީ 4 ވަނަ އަށެވެ. އެހެންކަމުން މި 2 ޓީމުވެސް ވަނީ މުބާރާތުން ކަޓާފައެވެ.
ހަމަ އެރޭ ކުރިއަށް ދިޔަ ދެވަނަ ބަހުސް އެފް.އެސް.އެލް އިން ކާމިޔާބުކުރީ ފެކަލްޓީ އޮފް އާރޓްސް (އެފް.އޭ)ގެ މައްޗަށް ކުރި ހޯދައިގެންނެވެ. މި ބަހުސްގެ ކުރިން ކުރެވުނު 2 ބަހުސް 2 ޓީމުންވެސް ވަނީ ކާމިޔާބުކޮށްފައެވެ. އެހެންކަމުން މި ބަހުސް އަކީ ގްރޫޕްގެ އެއްވަނަ ހޯދުމަށް ކޮންމެހެންވެސް ކާމިޔާބު ކުރަން ޖެހިފައި އޮތް ބަހުސް އެކެވެ. ”ދިވެހިރާއްޖޭގެ އިޤްތިޞާދު ހަރުދަނާ ކުރުމަށްޓަކައި ޓެކްސް ނަގާ މިންވަރު އިތުރު ކުރަން“ ނުޖެހޭ ކަމަށް ވަކާލާތު ކުރަމުން އެފް.އެސް.އެލް އިން ބަހުސް ކާމިޔާބު ކުރީ 891 – 779ގެ ނަތީޖާ އަކުންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އެސް.އެލްގެ އިސްމާޢީލް ރަޒީން އިމްރާނެވެ. މި ބަހުސް އިން ބަލިވި ކަމުގައިވިޔަސް، ގްރޫޕްގެ ދެވަނައިގެ ގޮތުގައި އެފް.އޭ ވަނީ ސެމީ ފައިނަލަށް ދަތުރުކޮށްފައެވެ.
ސެމީ ފައިނަލުގައި އެފް.އީ އިން ބައްދަލުކުރާނީ އަނެއް ގްރޫޕްގެ އެއްވަނަ ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް)އާއެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 9 ވަނަ މުބާރާތެވެ.
