ތިންވަނަރޭގެ އަންހެން ޑިވިޝަން މެޗުތަކުން އެމް.އެން.ޔޫ.ބީ.އެސް އަދި ވިލާ ކޮލެޖް މޮޅުވެއްޖެ

ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2022ގެ ތިންވަނަ ރޭގައި ކުޅެވުނު އަންހެން ޑިވިޝަނުގެ މެޗުތަކުން އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) އަދި ވިލާ ކޮލެޖް ކާމިޔާބުކޮށްފިއެވެ.

ބުދަ ދުވަހުގެރޭ ކުޅުނު ފުރަތަމަ މެޗުގައި އެމް.އައި ކޮލެޖް އަދި އެމް.އެން.ޔޫބީ.އެސް ބައްދަލުކުރި މެޗު އެމް.އެން.ޔޫ.ބީ.އެސް އިން ކާމިޔާބުކުރީ 2-0 ގެ ނަތީޖާއަކުންނެވެ. މި މެޗުގެ މޮޅުކުޅުންތެރިއަކަށް ހޮވިފައިވަނީ  އެމް.އެން.ޔޫ.ބީ.އެސް ގެ ޖަރޒީ ނަންބަރު 12 އާމިނަތު ޝަފާނާއެވެ.  މެޗުގެ ފުރަތަމަ ލަނޑު އެމް.އެން.ޔޫ.ބީ.އެސްގެ ޖަރޒީ ނަންބަރު 14 މަރިޔަމް ނިހާ ކާމިޔާބުކުރިއިރު މެޗުގެ ފަހު ލަނޑު ވެސް ކާމިޔާބުކޮށްފައިވަނީ ހަމަ އެ ޓީމުގެ ޖަރޒީ ނަންބަރު 11 ފިރުޝާނާ ނަސީރެވެ.

ބުދަ ދުވަހުގެރޭ 10:00 ގައި ކުޅުނު ދެވަނަ މެޗުގައި ފެކަލްޓީ އޮފް ޝަރީއާ އެންޑް ލޯ 5-0 ން ބަލިކޮށް، މި މެޗު ކާމިޔާބުކޮށްފައި ވަނީ ވިލާ ކޮލެޖެވެ. މި މެޗުގެ މޮޅު ކުޅުންތެރިޔާއަށް ހޮވުނީ މެޗުގައި ދެ ލަނޑު ކާމިޔާބުކުރި ވިލާ ކޮލެޖްގެ ޖަރޒީ ނަންބަރު 19 އަރީފާ އަބްދުﷲ އެވެ. މިމެޗުގައި ވިލާ ކޮލެޖްގެ ޖަރޒީ ނަންބަރު 10 އައިޝަތު އީނާޒް ވެސް ދެ ލަނޑު ކާމިޔާބުކޮށްފައިވާއިރު އެ ޓީމުގެ ޖަރޒީ ނަންބަރު 05 އިންޝާ އާމިރުވަނީ އެއް ލަނޑު ޖަހާފައެވެ.

ލެކްނޯ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ޓައިޓްލް ސްޕޮންސަރަކީ އެމް.ޔޫ ސްޓޯރުން އެތެރެކުރާ ”ލެކްނޯ“ ބްރޭންޑެވެ. މުބާރާތުގެ ކޯ-ސްޕޮންސަރަކީ ޤައުމީ ޔުނިވަރސިޓީގެ ކުންފުނި ޔުނިވިޔަ ހޯލްޑިންގްސް އެވެ. ސަޕޯޓިންގ ޕާޓްނަރުންނަކީ މޯލްޑިވްސް ޓްރޭޑިންގ އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)، މެންހަޓަން ބިޒްނަސް ހޮޓެލް، އޮންލައިން ނިއުސް ޢަދަދު، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފް.އޭ.އެމް) އެވެ. ސްޕޯޓްސް ޕާޓްނަރަކީ ސޮނީ ސްޕޯޓްސް އެވެ. މުބާރާތުގެ ޑިޖިޓަލް ޕާޓްނަރަކީ ދިރާގު ކަމަށްވާއިރު، ކިޓް ޕާޓްނަރަކީ ޕްރިންޓް ކޯއެވެ. ޕްރިންޓިންގ ޕާޓްނަރަކީ އެމް ސެވަން އެވެ. އަދި އެސޯސިއޭޓިވް ޕާޓްނަރަކީ އަދަދު އޮންލައިންއެވެ.

އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ. މި އަހަރު މި ބާއްވަނީ މީގެ 8 ވަނަ މުބާރާތެވެ. މިއަހަރުގެ މުބާރާތް މި ބޭއްވެނީ ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހުއެވެ. އެންމެ ފަހުން 2019 ވަނަ އަހަރު ބޭއްވި މުބާރާތުގެ ފިރިހެން ޑިވިޝަނުގެ ޗެމްޕިއަނަކީ އެވިޑް ކޮލެޖެވެ. އަދި އަންހެން ޑިވިޝަނުގެ ޗެމްޕިއަނަކީ އެމް.އައި ކޮލެޖެވެ. މި މުބާރާތް އެންމެ ފުރަތަމަ ބޭއްވުނީ 2013 ވަނަ އަހަރެވެ. އެއަށްފަހު 2019 ވަނަ އަހަރާ ހަމައަށް މެދުކެނޑުމެއްނެތި ކޮންމެ އަހަރަކު މި މުބާރާތް ކުރިއަށް ގެންދެވިފައިވެއެވެ. މުބާރާތުގައި އަންހެން ޑިވިޝަން ތަޢާރަފު ކުރެވުނީ 2018 ވަނަ އަހަރެވެ. މި މުބާރާތުގެ އެންމެ ކާމިޔާބު ޓީމަކީ މުބާރާތުގެ ފިރިހެން ޑިވިޝަނުގެ ތަށި 3 ފަހަރު ޙާޞިލުކޮށްފައިވާ އެމް.އެން.ޔޫ ބިޒްނަސް ސްކޫލެވެ.