ވައިސް ޗާންސެލަރ ޑރ. މުޙައްމަދު ޝަރީފަށް ދަރިވަރުންގެ ޔޫނިއަންގެ އެންމެ މަތީ ޝަރަފު އަރުވައިފި

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިން އަރުވާ އެންމެ މަތީ ޝަރަފު، ”އެމް.އެން.ޔޫ ދަރިވަރުންގެ ޔޫނިއަންގެ ޝަރަފުވެރިކަމާއި ޢިއްޒަތްތެރިކަމުގެ ނިޝާނުގެ ވެރިޔާ“ގެ ލަޤަބު ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ. މުޙައްމަދު ޝަރީފަށް އަރުވައިފިއެވެ.

މި ލަޤަބު ވައިސް ޗާންސެލަރ އަށް އަރުވާފައިވަނީ ދަރިވަރުންގެ ޔޫނިއަންގެ 11 ވަނަ ދައުރުގެ ހިންގާ ކޮމިޓީ އިފްތިތާހު ކުރުމަށް ހުކުރުދުވަހުގެރޭ އެމް.އެން.ޔޫގެ ސެންޓްރަލް އެޑްމިނިސްޓްރޭޝަންގައި ކުރިއަށްދިޔަ ހަފްލާއެއްގައެވެ. މި ހަފްލާގައި ވައިސް ޗާންސެލަރއަށް ޚާއްޞަކޮށް ވީޑިއޯ ރިޕޯޓެއްވެސް ވަނީ އަޅުވާފައެވެ.ވައިސް ޗާންސެލަރއަށް މި ޝަރަފު އަރުވާފައިވަނީ ދަރިވަރުންގެ ޔޫނިއަންގެ ރައީސް ހުސައިން ޒައިދެވެ.

ދަރިވަރުންގެ ޔޫނިއަންގެ އެންމެ މަތީ ޝަރަފަކީ ދަރިވަރުންގެ ޔޫނިއަންއަށް ތަފާތު އެކި ރޮނގުން ދެމިހުންނަނިވި ގޮތުގައި ގިނަ ޚިދުމަތްތަކެއް ކުރައްވާފައިވާ ފަރާތްތަކަށް އެކަމުގެ އަގު ވަޒަންކޮށް އެރުވޭ ޝަރަފުގެ މަޤާމެކެވެ. މިއީ 2018 ވަނަ އަހަރު ތަޢާރަފު ކުރެވުނު މަޤާމެކެވެ. ވައިސް ޗާންސެލަރއާއެކު މިހާތަނަށް 25 ފަރާތަކަށް ވަނީ މި ޝަރަފު އެރުވިފައެވެ.