ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ރައީސްކަމުގެ އިތުރު ދައުރަކަށް ކުރިމަތިލީ ފާއިތުވެދިޔަ ދައުރުގައި ކުލަ ޖެއްސިފައި ނުވާ ބައެއް ހުވަފެންތަކުގައި ކުލަ ޖެއްސުމުގެ ބޭނުމުގައިކަމަށް ދަރިވަރުންގެ ޔޫނިއަންގެ ރައީސް ޙުސައިން ޒައިދު ވިދާޅުވެއްޖެއެވެ.
ރައީސް ޒައިދު މިހެން ވިދާޅުވީ ދަރިވަރުންގެ ޔޫނިއަންގެ 11 ވަނަ ދައުރުގެ ހިންގާ ކޮމިޓީ އިފްތިތާހު ކުރުމަށް ހުކުރުދުވަހުގެރޭ އެމް.އެން.ޔޫގެ ސެންޓްރަލް އެޑްމިނިސްޓްރޭޝަންގައި ކުރިއަށްދިޔަ ހަފްލާގައި ވާހަކަ ދައްކަވަމުންނެވެ.
މި ހަފްލާގައި ވާހަކަ ދައްކަވަމުން ރައީސް ހުސައިން ޒައިދު އިތުރަށް ފާހަގަކުރެއްވި ގޮތުގައި ކުރިއަށް އޮތް ދައުރުގައި ދަރިވަރުންގެ ޔޫނިއަންގެ ނަން ޤައުމީ އިނާމަށް ހުށަހެޅުމުގެ މަސައްކަތް ކުރިއަށް ގެންދާނެއެވެ. އަދި މެދުކެނޑިފައިވާ އިންޓަރ ފެކަލްޓީ ނެޓްބޯޅަ މުބާރާތާއި ލ. ގަމުގައި ބާއްވާ އަހުރަ ހޭންޑްބޯޅަ މުބާރާތް އަލުން ބޭއްވުމުގެ މަސައްކަތް ކުރިއަށް ގެންދާނެއެވެ. މީގެ އިތުރުން ތުރީ ޕީސް ބޭންޑް ރަސްމީކުރުމުގެ މަސައްކަތާއި ޔޫނިއަންގެ ވެބްސައިޓް ރީބްރޭންޑް ކުރުމުގެ މަސައްކަތް ކުރިއަށް ގެންދިއުމަށް ނިންމާފައިވާކަމަށްވެސް ރައީސް ފާހަގަކުރެއްވިއެވެ. ހަމަ އެހެންމެ، ދަރިވަރުންގެ ޔޫނިއަންގެ ވެބްސައިޓް ނޫސް/މަޖައްލާއެއްގެ ގޮތުގައި ރަޖިސްޓްރީކުރުމުގެ މަސައްކަތްވެސް ކުރިއަށް ގެންދިއުމަށް ހަމަޖެހިފައިވާކަމަށްވެސް ޒައިދު ވަނީ ފާހަގަ ކުރައްވާފައެވެ.
މީގެ އިތުރުން، އިތުރަށް ވާހަކަ ދައްކަވަމުން ރައީސް ޒައިދު ވަނީ 10 ވަނަ ދައުރުގެ ތެރޭގައި އެމް.އެން.ޔޫ މެނޭޖްމަންޓުން ދެއްވި އެއްބާރުލުމަށް ޝުކުރު އަދާކުރައްވާފައެވެ. އަދި 10 ވަނަ ދައުރުގައި އެކުގައި މަސައްކަތް ކުރެއްވި ޓީމުގެ މެންބަރުންނަށް ވަކިވަކިން ރައީސް ޒައިދު ވަނީ ޝުކުރު އަދާކުރައްވާފައެވެ.
10 ވަނަ ދައުރު ނިމި، 11 ވަނަ ދައުރަކަށް ރައީސް ހުސައިން ޒައިދު ކުރިމަތިލާފައިވާއިރު، ދަރިވަރުންގެ ޔޫނިއަންގެ 10 ވަނަ ދައުރަކީ ގިނަ ހަރަކާތްތަކެއް ރާވާ އިންތިޒާމު ކުރެވިގެންދިޔަ ކާމިޔާބު ދައުރެކެވެ.
