ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އާއި މި ޔޫނިއަންގެ އަހުރަ ގޮތްޕާ ގުޅިގެން އިންތިޒާމުކޮށްގެން ބޭއްވުމަށް ހަމަޖެހިފައިވާ ”އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތް 2023″ގެ ޓައިޓްލް ސްޕޮންސަރަކަށް ލ. ގަމު ކައުންސިލް ހަމަޖައްސައިފިއެވެ.
މުބާރާތުގެ ސްޕޮންސަރޝިޕް އެއްބަސްވުމުގައި ސޮއިކޮށްފައިވަނީ މިކަމަށް ޚާއްސަކޮށް 23 ފެބުރުވަރީ ވީ ބުރާސްފަތި ދުވަހު ގަމު ކައުންސިލްގައި ބޭއްވި ހަފްލާއެއްގައެވެ.
ގަމު ކައުންސިލްގެ ފަރާތުން މި އެއްބަސްވުމުގައި ސޮއި ކުރެއްވީ ގަމު ކައުންސިލްގެ ރައީސް އަޙްމަދު ޒަކީ އެވެ. އަދި އެމް.އެން.ޔޫ.އެސް.ޔޫގެ ފަރާތުން މި އެއްބަސްވުމުގައި ސޮއި ކުރެއްވީ ނައިބު ރައީސް (ގޮފިތައް) ޖައިޝް ޢަލީ ވަހީދެވެ.
ޓައިޓްލް ސްޕޮންސަރ ހަމަޖެހުމާއެކު މިއަހަރުގެ ހޭންޑްބޯޅަ މުބާރާތް ބޭއްވޭނީ ”ގަމު ކައުންސިލް“ ނުބަތަ ގަމު ކައުންސިލުން ކަނޑައަޅާ ނަމެއް މުބާރާތުގެ ކުރިއަށް އިތުރުކޮށްގެންނެވެ. މި މުބާރާތުގައި ބައިވެރިވުމުގެ ފުރުޞަތު މިހާރު ވަނީ ހުޅުވާލެވިފައެވެ.
އަހުރަ ހޭންޑްބޯޅަ މުބާރާތަކީ ޔޫނިއަން އިން އަތޮޅުތެރޭގައި ބާއްވާ އެންމެ ބޮޑު ހަރަކާތެވެ. އެންމެ ފުރަތަމަ މި މުބާރާތް ބޭއްވީ 2017 ވަނަ އަހަރެވެ. އަދި އޭގެ ފަހުން 2018 އަދި 2019 ގައި ވެސް މުބާރާތް ކުރިއަށްދިޔައިރު، އޭގެ ފަހުން ކޮވިޑް-19ގެ ޢާލަމީ ވަބާއާއެކު މި މުބާރާތް އޮތީ 3 އަހަރަށް މެދުކެނޑިފައެވެ. އެހެންކަމުން މިއަހަރު މި ބޭއްވެނީ މި މުބާރާތުގެ 4 ވަނަ ޢަދަދެވެ. މި މުބާރާތް އެންމެ ފަހުން ބޭއްވުނު 2019 ވަނަ އަހަރު މި މުބާރާތުގެ އަންހެން އަދި ފިރިހެން ޗެންޕިއަންކަން ވެސް ހޯދާފައިވަނީ އިސްކަންދަރު އެއަރބޭސް އެވެ.
