ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން ލ. ގަމަށް ޒިޔާރަތްކުރި ޓީމުން އެމް.އެން.ޔޫ ގަން ކެމްޕަސް ދަރިވަރުންނާ ބައްދަލުކޮށްފިއެވެ.
ދަރިވަރުންނާ ބައްދަލުކޮށްފައިވަނީ ފެބުރުވަރީ 24 ވީ ހުކުރުދުވަހުގެރޭ ގަން ކެމްޕަހުގައެވެ.
މި ބައްދަލުވުމުގައި އެމް.އެން.ޔޫ.އެސް.ޔޫއާ ގުޅުންހުރި މައުލޫމާތު ދަރިވަރުންނާ ވަނީ ހިއްސާކޮށްފައެވެ. މައުލޫމާތު ހިއްސާކޮށްދެއްވީ ޔޫނިއަންގެ ނައިބު ރައީސް (ގޮފިތައް) ޖައިޝް ޢަލީ ވަހީދެވެ. މީގެ އިތުރުން މި ބައްދަލުވުމުގައި ގަން ކެމްޕަހުގެ ޔޫނިއަން ގޮފި އަހުރައިގެ ތާރީޚާއި އަހުރަ ގޮފީގެ ކާމިޔާބީތަކުގެ މައުލޫމާތު ދަރިވަރުންނާ ހިއްސާކޮށްދެއްވީ ޔޫނިއަންގެ މީޑިއާ ޓީމުގެ މެންބަރު ޢާއިޝަތު ޝުމަން އެވެ. ހަމަ އެހެންމެ، އަހުރަ ގޮފީގެ ހިންގާ ކޮމިޓީއާ ގުޅޭ މައުލޫމާތު ދެއްވާ، ދަރިވަރުންގެ އެކިއެކި ކަންބޮޑުވުންތަކާގުޅޭ ގޮތުން މަޝްވަރާކުރެއްވީ ޔޫނިއަންގެ ކުރީގެ ސެކްރެޓަރީ މަނާލް އަޙްމަދެވެ. އަދި ބައްދަލުވުމަށްފަހު ދަރިވަރުންނާއެކު ޓީމް ބިލްޑިންގެ ހަރަކާތްތައް ކުރިއަށް ގެންދެވުނުއިރު، މި ހަރަކާތްތައް ލީޑު ކުރައްވާފައިވަނީ ޔޫނިއަންގެ ޚަޒާންދާރު އަޙްމަދު ސަވާދެވެ.
ލ. ގަމަށް ޒިޔާރަތްކުރި ޓީމުން ގަން ކެމްޕަހުގެ މެނޭޖަރާވެސް ވަނީ ބައްދަލުކުރައްވާފައެވެ. އަދި ހަމަ އެހެންމެ، ނިމިދިޔަ ދައުރުގެ އަހުރަ ހިންގާ ކޮމިޓީ މެންބަރުންނާވެސް މި ޓީމުން ވަނީ ބައްދަލުކޮށްފައެވެ.
އަތޮޅުތެރޭ ކެމްޕަސްތަކަށް އަހަރަކު އެއްފަހަރު ކުރެވޭ ކެމްޕަސް ދަތުރުތަކަކީ ސިލްސިލާ ގޮތެއްގައި 2018 ވަނަ އަހަރުން ފެށިގެން އެމް.އެން.ޔޫ.އެސް.ޔޫ އިން ކުރިޔަށް ގެންދާ ދަތުރުތަކެކެވެ. ކޮވިޑާ ގުޅިގެން 2020 ވަނަ އަހަރު މެދުކެނޑުނުކަމުގައިވިޔަސް 2021 ވަނަ އަހަރުން ފެށިގެން މި ދަތުރުތައް ކުރެވިފައިވާކަން ފާހަގަކޮށްލެވެއެވެ.
