އެމް.އެން.ޔޫ.އެސް.ޔޫ ބެޑްމިންޓަން ޓޯނަމެންޓް: އެފްއީ އާއި އެސްއެމްއަށް މޮޅެއް

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) ބެޑްމިންޓަން ޓޯނަމެންޓް 2023 ގައި ފެކަލްޓީ އޮފް އެޑިއުކޭޝަން (އެފް.އީ އާއި ސްކޫލް އޮފް މެޑިސިން (އެސް.އެމް) ކުޅުނު މެޗުތައް ކާމިޔާބުކޮށްފިއެވެ.
ހުކުރު ދުވަހު ހަވީރު އެމް.އެން.ޔޫ ޕީއީ ހޯލުގައި ކުޅުނު ފުރަތަމަ މެޗުގައި ފެކަލްޓީ އޮފް ހެލްތު ސައިންސް (އެފް.އެޗް.އެސް)ގެ މައްޗަށް އެފް.އީ އިން ކުރިހޯދީ 4-1 ގޭމުންނެވެ.
މި މެޗުގެ ފުރަތަމަ ގޭމުގައި އެފް.އީގެ ޑަބަލްސް ޕެއާ ކަމަށްވާ ފާތިމަތު ރާޔާ ޝާހިދާއި ދަޔާނާ ހަސަންގެ ޕެއާ ނުކުތީ އެފް.އެޗް.އެސްގެ އައިޝަތު ނައިޚާ އާއި އައިޝަތު އުލްޔާ ވަހީދުގެ ޕެއާ ދެކޮޅަށެވެ. މި ގޭމު އެފް.އީ އިން ކާމިޔާބުކުރީ 3-1 ސެޓުންނެވެ. މި ގޭމުގެ ސެޓުތައް ދިޔައީ، 15-14، 4-15، 15-12 އިންނެވެ.
ދެވަނަ ގޭމުގައި އެފްއީ އިން ނުކުތީ އަޙްމަދު އަލީއެވެ. އަދި އެފްއެޗެއެސްއިން ނުކުތީ ހުމައިދު ހަސަންއެވެ. މި ގޭމު އެފް.އެޗް.އެސް.ގެ ހުމައިދު ކާމިޔާބުކުރީ ސީދާ ދެ ސެޓުންނެވެ. މި ގޭމުގެ ސެޓުތައް ދިޔައީ، 15-14 އަދި 15-14 އިންނެވެ.
ތިންވަނަ ގޭމުގައި އެފްއީގެ ރުބިން ސިންގް އާއި މުޙައްމަދު ސާއިޙް އަޙްމަދު ޝިހާމްގެ ޕެއާ ނުކުތްއިރު، އެފްއެޗްއެސް އިން ނުކުތީ އިސްމާއިލް ޖަޒްލާން އާއި މުޙައްމަދު ޖުމާންގެ ޕެއާއެވެ. މި ގޭމު ސީދާ ދެ ސެޓުން ކާމިޔާބުކުރީ އެފްއީއެވެ. މި ގޭމުގެ ސެޓުތައް ދިޔައީ 15-3 އަދި 15-7 އިންނެވެ.
ހަތަރުވަނަ ގޭމުގައި އެފްއީގެ މަރިޔަމް ނަބާހާ ނަސީމް ނުކުތްއިރު، އެފްއެޗްއެސް އިން ކުޅެންއެރީ ފާތިމަތު ޒިޔާންއެވެ. މި ގޭމު ފަސޭހަކަމާއެކު ސީދާ ދެ ސެޓުން ވަނީ އެފްއީގެ ނަބާހާ ކާމިޔާބުކޮށްފައެވެ. މި ގޭމުގެ ސެޓުތައް ދިޔައީ، 15-4 އަދި 15-2 އިންނެވެ.
މެޗުގެ ފަހު ގޭމުގައި އެފްއީގެ މުޙައްމަދު އަސްލަހް އަޝްރަފް އާއި އައިޝަތު ޝަދާ އަބްދުލް ޣަނީގެ ޕެއާ ކުޅެންއެރިއިރު، އެފްއެޗްއެސްއިން ކުޅެންއެރީ މުޙައްމަދު ސާހިލް އަލީ އާއި އާމިނަތު ޝައިބާގެ ޕެއާއެވެ. މި ގޭމު އެފްއީގެ ޕެއާއިން ކާމިޔާބުކުރީ ވެސް ސީދާ ދެ ސެޓުންނެވެ. މި ގޭމުގެ ސެޓުތައް ދިޔައީ 15-4 އަދި 15-5 އިންނެވެ.

މީގެ އިތުރުން ހުކުރު ދުވަހު ހަވީރު ކުޅުނު ދެވަނަ މެޗުގައި ބައްދަލުކުރީ ފެކަލްޓީ އޮފް ސަރިއާ އެންޑް ލޯ އާއި ސްކޫލް އޮފް މެޑިސިންއެވެ.
މި މެޗު އެސްއެމްއިން ކާމިޔާބުކޮށްފައިވަނީ ސީދާ ފަސް ގޭމުންނެވެ.
މި މެޗުގެ ފުރަތަމަ ގޭމުގައި އެސްއެމްގެ ޝަޖިއްޔާ އަލީ އާއި އައިޝަތު ޒީނާ އަބްދުލް ޖަލީލްގެ ޕެއާ ނުކުތްއިރު، އެފްއެސްއެލްއިން ނުކުތީ މާރިޔަތު އުނޫޝާ އާއި އައިޝަތު ހައިފާގެ ޕެއާއެވެ. މިއީ މުޅި މި މެޗުގައި ފެނިގެންދިޔަ އެންމެ ފޯރިގަދަ ގޭމެވެ.
ވާދަވެރި ކުޅުމަކަށްފަހު މި ގޭމު އެސްއެމްގެ ޕެއާއިން ކާމިޔާބުކުރީ 3-1 ސެޓުންނެވެ. މި ގޭމުގެ ސެޓުތައް ދިޔައީ 8-15، 15-14 އަދި 6-15 އިންނެވެ.
ދެވަނަ ގޭމުގައި އެސްއެމްއިން ކުޅެންއެރީ ހުސެއިން އައްޒާމްއެވެ. އަދި އެފްއެސްއެލް އިން ކުޅެންއެރީ މުޙައްމަދު އިރުހާޝްއެވެ. މި ގޭމު ސީދާ ދެ ސެޓުން ކާމިޔާބުކުރީ އެސްއެމްގެ އައްޒާމްއެވެ. މި ގޭމުގެ ސެޓުތައް ދިޔައީ 15-7 އަދި 15-1 އެވެ.
ތިންވަނަ ގޭމުގައި އެސްއެމްގެ މުނީބު އިސްމާއިލް މުޙައްމަދު އާއި ސައިފުﷲ މުސްލިމްގެ ޕެއާ ނުކުތްއިރު، އެފްއެސްއެލް އިން ނުކުތީ އަލްތަފް ރަޝާދު އާއި އަންސަދް ހަސަންގެ ޕެއާއެވެ. މި ގޭމު ވެސް އެސްއެމް އިން ވަނީ ފަސޭހަކަމާއެކު ސީދާ ދެ ސެޓުން ކާމިޔާބުކޮށްފައެވެ. މި ގޭމުގެ ސެޓުތައް ދިޔައީ 15-10 އަދި 15-6 އިންނެވެ.
ހަތަރުވަނަ ގޭމުގައި އެސްއެމްގެ ނަދާ ހުސެއިން ކުޅެންއެރިއިރު، އެފްއެސްއެލް އިން ކުޅެންއެރީ ފާތިމަތު ޝަފާއެވެ. މި ގޭމުވެސް އެސްއެމް އިން ކާމިޔާބުކުރީ ސީދާ ދެ ސެޓުންނެވެ. މި ގޭމުގެ ސެޓުތައް ދިޔައީ 15-2 އަދި 15-3 އިންނެވެ.
މެޗުގެ ފަހު ގޭމުގައި އެސްއެމްގެ މުޙައްމަދު ރާއިފް އީސާ އާއި މަރިޔަމް ނަސްމާގެ ޕެއާ ކުޅެންއެރިއިރު، އެފްއެސްއެލް އިން ކުޅެން އެރީ އައިޝަތު ޝާލިޔާ އާއި އަލީ މައިސާންގެ ޕެއާއެވެ. މި ގޭމު ވެސް ފަސޭހަކަމާއެކު ސީދާ ދެ ސެޓުން ކާމިޔާބުކުރީ އެސްއެމްގެ ޕެއާއެވެ. މި ގޭމުގެ ސެޓުތައް ދިޔައީ 15-9 އަދި 15-5 އިންނެވެ.
މި މުބާރާތުގައި ކުޅުމަށް ހަމަޖެހިފައިވަނީ ހަމައެކަނި ޓީމު އިވެންޓްގެ މެޗުތަކެވެ. މިއީ އެމް.އެން.ޔޫ.އެސް.ޔޫ އިން ބާއްވާ ފުރަތަމަ ބެޑްމިންޓަން މުބާރާތެވެ. މުބާރާތުގެ ހުރިހާ މެޗެއް ކުޅުމަށް ހަމަޖެހިފައިވަނީ އެމް.އެން.ޔޫ ޕީ.އީ ހޯލުގައި ކަމަށްވާއިރު، މުބާރާތް ކުރިއަށް ދާނީ އެޕްރީލު މަހުގެ 06 ން 13 އަށެވެ. މި މުބާރާތް ކުރިއަށް ގެންދެވެނީ ބެޑްމިންޓަން އެސޯސިއޭޝަން އޮފް ދަ މޯލްޑިވްސްގެ ފުރިހަމަ އެހީތެރިކަމާއެކުގައެވެ.