އެމް.އެން.ޔޫ.އެސް.ޔޫ ބެޑްމިންޓަން މުބާރާތް 2023 ފުރަތަމަ ސެމީ ފައިނަލު މެޗުގައި ފަހަތުން އަރާ 3-1 ން ސްކޫލް އޮފް މެޑިސިން (އެސް.އެމް) ބަލިކޮށް ފެކަލްޓީ އޮފް އެޑިއުކޭޝަން (އެފް.އީ) އިން ފައިނަލަށް ދަތުރުކޮށްފިއެވެ.
މި މެޗުގެ އަންހެން ޑަބަލްސް ގޭމު ކާމިޔާބުކޮށްފައިވަނީ ސްކޫލް އޮފް މެޑިސިންގެ ސާޖިޔާ ޢަލީ އަދި ޢާއިޝަތު ޒީނާ ޢަބްދުލްމަޖީދުގެ ޕެއާ އިންނެވެ. މި ޕެއާ އިން މި ގޭމު ކާމިޔާބުކުރީ 15-9 އަދި 15-11ން ސެޓުތައް ގެންގޮސްގެންނެވެ. މި ގޭމުގައި އެފް.އީ އިން ކުޅެފައިވަނީ ފާޠިމަތު ރާޔާ ޝާހިދު އަދި ދަޔާނާ ޙަސަންގެ ޕެއާ އެވެ.
އެފް.އީ އިން މެޗުން މޮޅުވެފައިވަނީ ދެން ކުޅުނު ތިން ގޭމުވެސް ކާމިޔާބުކޮށްގެންނެވެ. މިގޮތުން ފިރިހެން ސިންގަލްސް މެޗު އެފް.އީގެ ރުބެން ސިންގު ކާމިޔާބުކުރީ 15-2 އަދި 15-3ން ސެޓުތައް ގެންގޮސްގެންނެވެ. މި ގޭމުގައި އެސް.އެމް އިން ކުޅުނީ މުޙައްމަދު އަނޫފް ޝަހީމެވެ.
ފިރިހެން ޑަބަލްސް ގޭމު އެފް.އީ އިން ކާމިޔާބުކުރީ 15-5 އަދި 15-10ން ސެޓުތައް ގެންގޮސްގެންނެވެ. މި ގޭމުގައި އެފް.އީ އިން ކުޅުނީ އަޙްމަދު ޢަލީ އަދި މުޙައްމަދު ސާއިހު އަޙްމަދު ޝިހާމްގެ ޕެއާ ކަމަށްވާއިރު އެސް.އެމް އިން ކުޅުނީ ސައިފުﷲ މުސްލިމް އަދި ޙުސައިން ޢައްޒާމުގެ ޕެއާ އިންނެވެ.
އެފް.އީ އިން މެޗުން މޮޅުވީ އަންހެން ސިންގަލްސް ގޭމުގެ ސެޓުތައް ފަސޭހަކަމާއެކު 15-3 އަދި 15-6ން ގެންގޮސްގެންނެވެ. އެފް.އީ އިން އަންހެން ސިންގަލްސްގައި ކުޅުނީ މަރިޔަމް ނަބާހާ ނަސީމް ކަމަށްވާއިރު އެސް.އެމް އިން ކުޅުނީ ނަދާ ޙުސައިނެވެ.
މުބާރާތުގެ ފައިނަލު މެޗު ކުޅެން ހަމަޖެހިފައިވަނީ އަންނަ ބުރާސްފަތި ދުވަހުގެ ރެޔެވެ. މި މެޗުގައި އެފް.އީ އާ ބައްދަލުކުރާނީ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އެވެ.
މި މުބާރާތުގައި ކުޅުމަށް ހަމަޖެހިފައިވަނީ ހަމައެކަނި ޓީމު އިވެންޓްގެ މެޗުތަކެވެ. މިއީ އެމް.އެން.ޔޫ.އެސް.ޔޫ އިން ބާއްވާ ފުރަތަމަ ބެޑްމިންޓަން މުބާރާތެވެ. މުބާރާތުގެ ހުރިހާ މެޗެއް ކުޅުމަށް ހަމަޖެހިފައިވަނީ އެމް.އެން.ޔޫ ޕީ.އީ ހޯލުގައި ކަމަށްވާއިރު، މުބާރާތް ކުރިއަށް ދާނީ އެޕްރީލު މަހުގެ 06 ން 13 އަށެވެ. މި މުބާރާތް ކުރިއަށް ގެންދެވެނީ ބެޑްމިންޓަން އެސޯސިއޭޝަން އޮފް ދަ މޯލްޑިވްސްގެ ފުރިހަމަ އެހީތެރިކަމާއެކުގައެވެ.
