ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ ނުވަ ވަނަ ”އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2023″ގައި ބައިވެރިވުމުގެ ފުރުޞަތު ހުޅުވާލައިފިއެވެ.
މި މުބާރާތުގައި ބައިވެރިވުމުގެ ފުރުޞަތު ހުޅުވާލާފައިވަނީ ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ/ސެންޓަރުތަކަށާއި އެމް.އެން.ޔޫ.އެސް.ޔޫ އިން ދަޢުވަތުދޭ ހައިސްކޫލް/ކޮލެޖް/ޔުނިވަރސިޓީތަކަށެވެ.
މުބާރާތުގައި ބައިވެރިވުމުގެ ފޯމު ހުށަހެޅުމުގެ ސުންގަޑި އަކީ 2023 އެޕްރީލް 27 ވާ ބުރާސްފަތިދުވަހުގެ މެންދުރުފަހު 02:00 އެވެ. އަދި ޓީމު ލިސްޓު ހުށަހެޅުމުގެ ސުންގަޑި އަކީ 2023 މެއި 09 ވާ އަންގާރަދުވަހުގެ މެންދުރުފަހު 02:00 އެވެ. ފޯމުތައް ޔޫނިއަންގެ މެއިލް (studentunion@mnu.edu.mv) އަށް ނުވަތަ ޔޫނިއަންގެ އޮފީހަށް ހުށަހެޅޭނެއެވެ. ފޯމު ލިބެން ހުންނާނީ މި ވެބްސައިޓުގެ ޑައުންލޯޑްސް ޕޭޖުންނެވެ.
މުބާރާތް ކުރިއަށް ގެންދިއުމަށް ތާވަލު ކުރެވިފައިވަނީ 2023 މެއި 15 ން 23 އަށެވެ.
ސިލްސިލާ ގޮތެއްގައި ބާއްވަމުންދާ މި މުބާރާތަކީ އެމް.އެން.ޔޫ.އެސް.ޔޫގެ 2 ވަނަ އަށް އެންމެ ބޮޑު ޙަރަކާތެވެ. މިއަހަރު ބޭއްވުމަށް ހަމަޖެހިފައިވަނީ މީގެ 9 ވަނަ މުބާރާތެވެ. ވޭތުވެދިޔަ އަހަރު ފިރިހެން ޑިވިޝަނުގެ ފައިނަލުގައި ސެންޓަރ ފޯ ފައުންޑޭޝަން ސްޓަޑީޒްގެ މައްޗަށް ކުރިހޯދައި ޗެމްޕިއަންކަން ހޯދާފައިވަނީ ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ އެވެ. އަދި އެމް.އެން.ޔޫ ބިޒްނަސް ސްކޫލް ބަލިކޮށް އަންހެން ޑިވިޝަނުގެ ތަށި އުފުލާލީ ސްކޫލް އޮފް ނާރސިންގ އެވެ.
