”އެމް.އެން.ޔޫ.އެސް.ޔޫ ބަހުސް މުބާރާތް 2023″ގެ ގްރޫޕް ސްޓޭޖުގެ ހުރިހާ ބަހުސަކުން މޮޅުވެ ސައްތައިން ސައްތަ ރިކޯޑަކާއެކު ސްކޫލް އޮފް މެޑިސިން (އެސް.އެމް) އިން ސެމީ ފައިނަލަށް ދަތުރުކޮށްފިއެވެ.
ސެމީ ފައިނަލުގައި އެސްއެމް ވާދަކުރާނީ ގްރޫޕް ދޭއްގެ ދެވަނަ ޓީމު ފެކަލްޓީ އޮފް ހެލްތު ސައިންސް (އެފް.އެޗް.އެސް) އާއެވެ. އެފް.އެޗް.އެސް އިން ސެމީއަށް ދަތުރުކުރީ އަންގާރަ ދުވަހުގެރޭ ކުރަން އޮތް ބަހުސް ސީ.އެފް.އެސް އިން ދޫކޮށްލުމާއި ގުޅިގެން ގްރޫޕް އެކެއްގެ ދެވަނަ ޓީމުގެ ގޮތުގައެވެ.
މެއި 9 ވީ އަންގާރަދުވަހުގެރޭ ތިން ބަހުސް ކުރަން ހަމަޖެހިފައި އޮތް ނަމަވެސް ކުރެވިފައިވަނީ އެންމެ ބަހުސެކެވެ. އެއީ އެސް.އެމް އާއި ސްކޫލް އޮފް ނާސިންގެ ބަހުސެވެ. މި ބަހުސްގެ މައުޟޫއަކީ ”އިޖުތިމާއި ރައްކާތެރިކަން ކަށަވަރުކުރުމަށް އެންމެ މުހިންމު ނިޒާމަކީ އާސަންދައިގެ ނިޒާމެވެ.“ މައުޟޫއާ އެއްކޮޅަށް ބަހުސްކޮށްފައިވަނީ އެސް.އެންއެވެ. އަދި ދެކޮޅަށް ބަހުސްކުރީ އެސް.އެމްއެވެ. މި ބަހުސް 597-347 ގެ ނަތީޖާއަކުން ކާމިޔާބުކުރީ އެސް.އެމް އެވެ.
މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވުނީ އެސް.އެމްގެ އަނޫފް އަބްދުﷲއެވެ. އެއާއެކު އަނޫފް ވަނީ ގްރޫޕް ސްޓޭޖުގެ ހުރިހާ ބަހުސްއަކުން އެންމެ މޮޅު ބަހުސްކުރުންތެރިޔާގެ މަގާމު ހޯދައިފައެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދިވެހި ބަސް ދިރުވައި އާލާކޮށް، ބަހުގެ ހަމަތަކާ އެއްގޮތަށް ދިވެހިބަސް ބޭނުން ކުރަން ބާރުއެޅުމަށާއި ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ ސިލްސިލާކޮށް ބޭއްވޭ މި މުބާރާތުގެ 10 ވަނަ މުބާރާތެވެ.
