އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2023 ގެ އަންހެން ޑިވިޝަންގެ ގްރޫޕް އޭގެ ތިންވަނަ މެޗުގައި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (އެފް.އެޗް.ޓީ.އެސް)ގެ މައްޗަށް ކުރިހޯދާ ސްކޫލް އޮފް މެޑިސިން (އެސް.އެމް) އިން އެ ޓީމުގެ ފުރަތަމަ މޮޅު ހޯދައިފިއެވެ.
މެއި 18 ވީ ބުރާސްފަތި ދުވަހުގެރޭ ކުޅުނު މި މެޗު އެސް.އެމް އިން ކާމިޔާބު ކުރީ 25-7 އަދި 25-20ގެ ނަތީޖާތަކަކުން ސެޓުތައް ގެންގޮސްގެންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވުނީ އެސް.އެމްގެ ޖަރޒީ ނަންބަރު 10 ރަނާ މުޙައްމަދު ސަޢީދެވެ.
މި ގްރޫޕްގެ ފުރަތަމަ ދެ މެޗު ކާމިޔާބުކޮށްފައިވަނީ ފެކަލްޓީ އޮފް ހެލްތު ސައިންސަސް އަދި އެމް.އެން.ޔޫ ބިޒްނަސް ސްކޫލެވެ.
މުބާރާތުގެ ގްރޫޕް ސްޓޭޖު މެޗުތައް ކުޅެވިގެންދަނީ 3 ސެޓަށެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މިއަހަރު މި ބޭއްވެނީ 2015 ވަނަ އަހަރުން ފަށައިގެން ސިލްސިލާގޮތެއްގައި މެދުކެނޑުމެއްނެތި ބާއްވަމުން އަންނަ މި މުބާރާތުގެ 9 ވަނަ މުބާރާތެވެ. މިއަހަރުގެ މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ އެމް.އެން.ޔޫ ޕީ.އީ ހޯލުގައި ކަމަށްވާއިރު، މުބާރާތް ކުރިއަށްދާނީ މޭ މަހުގެ 15 ން 22 އަށެވެ.
