އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް 2023ގެ ފިރިހެން ޑިވިޝަނުގެ ފައިނަލު މެޗުގައި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) ބަލިކޮށް، ޖެހިޖެހިގެން ދެވަނަ ފަހަރަށް މުބާރާތުގެ ތަށި ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓު)ން އުފުލާލައިފިއެވެ.
މެއި މަހުގެ 22 ވީ ހޯމަ ދުވަހުގެރޭ ކުޅުނު މި މެޗު ފެސްޓުން ކާމިޔާބު ކުރީ 3-2 ސެޓުންނެވެ. މި މެޗުގެ ފުރަތަމަ ދެ ސެޓު 25-22 އަދި 25-16ން ފެސްޓުން ގެންގޮސްފައިވަނިކޮށް، ފަހަތުން އަރާ ސީ.އެފް.އެސް އިން ވަނީ ތިންވަނަ ސެޓު 25-20 ން އަދި ހަތަރުވަނަ ސެޓު 25-21 ން ކާމިޔާބުކޮށްފައެވެ. ނަތީޖާ ނެރުމަށް ކުޅުނު ފަސްވަނަ ސެޓު ފެސްޓުން ކާމިޔާބުކުރީ 15-10ންނެވެ.
މިއީ ފެސްޓުން މުބާރާތުގެ ތަށި ހޯދި ދެވަނަ ފަހަރެވެ. މިދިޔަ އަހަރުގެ ޗެމްޕިއަނަކީވެސް ފެސްޓެވެ. ފައިނަލުގައި ވާދަކުރީ ހަމަ ސީ.އެފް.އެސްއާ ކަމަށްވާއިރު ނަތީޖާ އަކީ ވެސް 3-2 ސެޓެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ ދަރިވަރުންގެ ޔޫނިއަންގެ ދެވަނަ އަށް އެންމެ ބޮޑު ހަރަކާތެވެ. މިއަހަރު މި ބޭއްވެނީ 2015 ވަނަ އަހަރުން ފަށައިގެން ސިލްސިލާގޮތެއްގައި މެދުކެނޑުމެއްނެތި ބާއްވަމުން އަންނަ މި މުބާރާތުގެ 9 ވަނަ މުބާރާތެވެ. މިއަހަރުގެ މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ އެމް.އެން.ޔޫ ޕީ.އީ ހޯލުގައި ކަމަށްވާއިރު، މުބާރާތް ކުރިއަށްދާނީ މޭ މަހުގެ 15 ން 22 އަށެވެ.
