އަންހެން ޓީމުގެ ދެވަނަ މެޗުވެސް ކާމިޔާބުކުރީ ފަސޭހަކަމާއެކު!

ސްޓޫޑެންޓް ޔޫނިއަން އޮފް އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް.އެސް.ޔޫ) އާއި ހޭންޑްބޯލް އެސޯސިއޭޝަން އޮފް ދަ މޯލްޑިވްސްއާ ގުޅިގެން ބާއްވާ އައި.ޔޫ.އެމް.އެސް.ޔޫ ހޭންޑްބޯލް ފިއެސްޓާ 2023 ގެ އަންހެން ޑިވިޝަނުގައި ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) ކުޅުނު ދެވަނަ މެޗު މެޕްސް ކޮލެޖާ ވާދަކޮށް ކާމިޔާބުކޮށްފިއެވެ.

އޮގަސްޓް 27 ވީ އާދީއްތަ ދުވަހު ހަވީރު 04:30ގައި ނޭޝަނަލް ހޭންޑްބޯލް ކޯޓުގައި ކުޅުނު މި މެޗު އެމް.އެން.ޔޫ އިން ކާމިޔާބު ކުރީ 28 – 5ގެ ތަފާތު ބޮޑު ނަތީޖާއަކުންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެމް.އެން.ޔޫ ޓީމުގެ ޖަރޒީ ނަންބަރު 11 ފިރުޝާނާ ނަޞީރެވެ.

މި މުބާރާތުގައި އެމް.އެން.ޔޫގެ އަންހެން ޓީމު ކުޅުނު ފުރަތަމަ މެޗު ވެސް ވަނީ ކާމިޔާބުކޮށްފައެވެ. އެ މެޗު ކާމިޔާބުކުރީ ވިލާ ކޮލެޖު ސްޓޫޑެންޓް އެސޯސިއޭޝަން (ވީ.ސީ.އެސް.އޭ)އާ ބައްދަލުކޮށެވެ. އެމް.އެން.ޔޫ ޓީމުގެ ތިންވަނަ މެޗުގައި ބައްދަލުކުރާނީ އައި.ޔޫ.އެމް.އެސް.ޔޫ އާއެވެ. މި މެޗު ކުޅުމަށް ހަމަޖެހިފައިވަނީ ހޯމަދުވަހުގެރޭ 09:30ގައެވެ.

އައި.ޔޫ.އެމް.އެސް.ޔޫ ހޭންޑްބޯލް ފިއެސްޓާ 2023 ގެ އަންހެން އަދި ފިރިހެން ޑިވިޝަނުގައި އެމް.އެން.ޔޫ އިން ވަނީ ބައިވެރިވެފައެވެ. މި މުބާރާތުގެ މިދިޔަ އަހަރުގެ އަންހެން ޗެމްޕިއަނަކީ އެމް.އެން.ޔޫ އެވެ.