ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ގެނެސްދޭ ”އެމް.އެން.ޔޫ.އެސް.ޔޫ ޕްރެޒެންޓްސް ދަ ނެކްސްޓް ލެވެލް“ ޝޯވ ގައި ފޯރިގަދަ ހުށަހެޅުންތަކެއް ފެނިގެންގޮސްފިއެވެ.
މިއަހަރުގެ ޝޯވ ކުރިއަށް ދިޔައީ ނޮވެންބަރު މަހުގެ 3 ވީ ހުކުރު ދުވަހުގެރެޔެވެ.
މި ޝޯވ ފެށިގެން ގޮސްފައިވަނީ ދަރިވަރުންގެ ޔޫނިއަންގެ އެސިސްޓެންޓް ސެކްރެޓަރީ ފާޠިމަތު ނައުޝީންގެ ވާހަކަ ދެއްކެވުމަށްފަހެވެ. މި ޝޯވ ގައި މާލޭ ކެމްޕަސް 10 ގޮފީގެ ފަރާތުން ޖުމްލަ 16 އައިޓަމެއް ވަނީ ފެނިގެންގޮސްފައެވެ. އޭގެ ތެރޭގައި މަދަހަ ކިޔުން، ލަވަކިޔުން، އަދި ޑްރާމާގެ އިތުރުން ނެށުމުގެ ހަރަކާތްތައް ހިމެނެއެވެ. ހަމަ އެހެންމެ، ސްޓޭންޑް އަޕް ކޮމެޑީގެ ހުށަހެޅުމެއްވެސް މިއަހަރުގެ ޝޯވގައި ވަނީ ފެނިގެން ގޮސްފައެވެ.
މި އައިޓަމްތަކުގެ އިތުރުން އެމް.އެން.ޔޫ.އެސް.ޔޫ ޑާންސް ގްރޫޕާއި އެމް.އެން.ޔޫ.އެސް.ޔޫ ބޮޑުބެރު ގްރޫޕްގެ ފަރާތުން ފޯރިގަދަ ހުށަހެޅުންތަކެއްވެސް މި ޝޯވ ގައި ކުރިއަށްދިޔަކަން ފާހަގަކޮށްލެވެއެވެ.
މި ހަރަކާތަކީ މުބާރާތެއްގެ ސިފައިގައި ކުރިއަށް ގެންދެވޭ ހަރަކާތެކެވެ. މިގޮތުން އެންމެ މޮޅު ތިން ޕާފޯމެންސްގެ އިތުރުން އެންމެ މޮޅު ތިން ފެކަލްޓީ ވެސް މި ހަރަކާތުގެ ތެރެއިން ހޮވިގެންދާނެއެވެ.
މިއަހަރުގެ ނެކްސްޓް ލެވެލް ޝޯވ ކުރިއަށްދިޔައީ އެމް.އެން.ޔޫ.އެސް.ޔޫގެ 11 ވަނަ އަހަރީ ދުވަހުގެ މުނާސަބާތާ ގުޅުވައިގެންނެވެ. އެމް.އެން.ޔޫ.އެސް.ޔޫގެ އަހަރީ ދުވަހަކީ ނޮވެންބަރު މަހުގެ 6 ވަނަ ދުވަހެވެ.
ދަ ނެކްސްޓް ލެވެލް އަކީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިން އިންތިޒާމުކޮށްގެން ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންނަށް އެ ދަރިވަރުންގެ ހުނަރު ދައްކާލުމަށް ހުޅުވާލާ މަންސައެކެވެ.
