ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) ގެ 12 ވަނަ ދައުރުގެ ހިންގާ ކޮމިޓީ ޤައުމީ ޔުނިވަރސިޓީގެ ވައިސް ޗާންސެލަރ ޑރ. މުޙައްމަދު ޝަރީފް އިފްތިތާހުކޮށްދެއްވައިފިއެވެ.
ހިންގާ ކޮމިޓީ އިފްތިތާހުކޮށްފައިވަނީ މިކަމަށް ޚާއްޞަކޮށް މިދިޔަ ހޮނިހިރުދުވަހުގެރޭ ޤައުމީ ޔުނިވަރސިޓީގެ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި ބޭއްވި ހަފްލާއެއްގައެވެ.
މި ހަފްލާ އަކީ ދަރިވަރުންގެ ޔޫނިއަންގެ އަހަރީ ޢާންމު ޖަލްސާވެސް ކުރިއަށްދިޔަ ހަފްލާކަން ފާހަގަކޮށްލެވެއެވެ. މީގެ އިތުރުން، މި ހަފްލާގައިވަނީ ދަރިވަރުންގެ ޔޫނިއަން އަށް އެކި ގޮތްގޮތުން އެހީތެރިވަމުން އަންނަ ފަރާތްތަކަށް އިނާމުވެސް ދީފައެވެ. މިގޮތުން އިސްވާރުންގެ އިނާމު ޖުމްލަ 169 ދަރިވަރަކަށް ދީފައިވާއިރު، މަރްޙޫމް އަޙްމަދު މުޙައްމަދުގެ ހަނދާނުގައިދެވޭ އެމް.އެން.ޔޫ.އެސް.ޔޫ ދަރުމަވެރިންގެ އިނާމު 54 ފަރާތަކަށްވަނީ ދީފައެވެ. ހަމައެހެންމެ، އެމް.އެން.ޔޫ.އެސް.ޔޫ އިޖުތިމާޢީ ޚިދުމަތުގެ އިނާމު 29 ފަރާތަކަށް ދީފައިވާއިރު، މަރްޙޫމް އަޙްމަދު ޢަބްދުﷲ ނަޞީރުގެ ހަނދާނުގައިދެވޭ އެމް.އެން.ޔޫ.އެސް.ޔޫ ޝަރަފުވެރިކަމުގެ އިނާމު 9 ފަރާތަކަށް ވަނީ ދީފައެވެ.
ދަރިވަރުންގެ ޔޫނިއަންގެ 12 ވަނަ ދައުރުގެ ރައީސަކީ ޖައިޝް ޢަލީ ވަޙީދެވެ. ނައިބު ރައީސް (ޢިލްމީ) އަކީ މުޙައްމަދު ނާބިތު އަޙްމަދު ކަމަށްވާއިރު ނައިބު ރައީސް (ގޮފިތައް) އަކީ ސައިފުﷲ މުސްލިމެވެ. އަދި ނައިބު ރައީސް (އިތުރު ހަރަކާތް)ގެ މަޤާމު ފުރާނީ އިބްރާހީމް މިޝަލް މޫސާއެވެ. ސެކްރެޓަރީގެ މަޤާމުގައި ހުންނާނީ މުޙައްމަދު ހިޒުޔަމް ޙާމިދު ކަމަށްވާއިރު އެސިސްޓެންޓް ސެކްރެޓަރީ އަކީ އަޙްމަދު ޒާމިލު މޫސާ އެވެ. ހަމަ މިއާއެކު ޚަޒާންދާރުގެ މަޤާމު ފުރާނީ އަޙްމަދު ސަވާދެވެ. އަދި މީޑިއާ ކޯޑިނޭޓަރަކަށް ހުންނާނީ ހަސްނާ ވިޝާމެވެ.
ދަރިވަރުންގެ ޔޫނިއަންގެ 12 ވަނަ ދައުރުގެ ހިންގާ ކޮމިޓީއަށް ކުރިމަތިލުމަށް ހުޅުވާލާފައިވަނީ 2023 އޮކްޓޫބަރު 17 ގައެވެ. މުއްދަތު ހަމަވިއިރު، ކޮންމެ މަޤާމަކަށްވެސް ކުރިމަތިލާފައިވަނީ އެންމެ ކެންޑިޑޭޓެއްކަމަށްވާތީ، އެ ކެންޑިޑޭޓުން ވަނީ އިންތިޚާބަކާނުލައި މަޤާމުތަކަށް ހޮވިފައެވެ.
