ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އަން އަލަށް ގުޅުނު އިސްވާރުންނަށް އަމާޒުކޮށްގެން މިއަހަރު ބޭއްވި ފުރަތަމަ ލީޑަރސް ނައިޓް ކާމިޔާބުކަމާއެކު ނިންމާލައިފިއެވެ.
ހުކުރު ދުވަހުގެ ރޭ އެމް.އެން.ޔޫގެ އެފް.އީ ޕީއީ ހޯލުގައި ކުރިއަށްގެންދިޔަ މިހަރަކާތުގައި 150އަށް ވުރެ ގިނަ އައު އިސްވާރުން ވަނީ ބައިވެރިވެފައެވެ. އަދި އެމް.އެން.ޔޫ.އެސް.ޔޫ ހިންގާ ކޮމެޓީގެ މެމްބަރުންނާއި އެޑްވައިޒަރީ ބޯޑުގެ މެމްބަރުންގެ އިތުރުން ކުރީގެ އިސްވާރުންވެސް ވަނީ ބައިވެރިވެފައެވެ.
މި ހަރަކާތުގައި ދަރިވަރުންގެ ޔޫނިއަންގެ ހިންގާ ކޮމެޓީގެ މެންބަރުން ވަނީ ވާހަކަދައްކާފައެވެ. އަދި ޔޫނިއަންގެ ކުރީގެ އިސްވާރުންނާއި، އެޑްވައިޒަރީ ބޯޑުގެ މެންބަރުންވެސް ވަނީ ވާހަކަދައްކާފައެވެ. މި ވާހަކައިގައި ދަރިވަރުންގެ ޔޫނިއަންގެ މަސައްކަތްތަކާއި ޔޫނިއަންއާބެހޭ ގިނަ މަޢުލޫމާތުތައް ވަނީ ޙިއްސާކޮށްފައެވެ.
މި ލީޑަރސް ނައިޓުގައި އެމް.އެން.ޔޫ.އެސް.ޔޫ އިން ދަރިވަރުންނަށް ފަހި ކޮށްދެވޭ ފުރުސަތުތަކާއި، މި ޓާމުގައި ކުރިއަށް ރޭވިފައި ހުރި ހަރަކާތްތައް ވަނީ ހިއްސާކޮށްފައެވެ.
މި ފަހަރުގެ ލީޑަރސް ނައިޓަށް މާލެ ސިޓީ ކައުންސިލްގެ މޭޔަރު އާދަމް އާޒިމްވަނީ ދީލަތި އެހީތެރިކަމެއް ފޯރުކޮށްދެއްވާފައެވެ. އެގޮތުން އިވެންޓަށް ބޭނުންވާ ގިފްޓް ޕެކުތަކާއި އެހެނިހެން ހަދިޔާ މޭޔަރ އާޒިމް ވަނީ ސްޕޮންސަރ ކޮށްދެއްވާފައެވެ. މިކަމަށްޓަކާ އެމް.އެން.ޔޫ.އެސް.ޔޫގެ ހިންގާ ކޮމިޓީއިން ވަނީ މޭޔަރ އަށް ޚާއްސަ ޝުކުރެއް ދަންނަވާފައެވެ.
ހުކުރު ދުވަހުގެ ރޭގެ މި ޙަރަކާތުގައި ތަފާތު ކުޅިވަރުތަކުގެ އިތުރުން، ލަކީ ޑްރޯއިން ހޮވުނު ދަރިވަރުންނަށް ވަނީ އިނާމު ވެސް ހަވާލުކޮށްފައެވެ. އެގޮތުން، އޭވް، ސްކިން އެސެންޝަލްސް ބައި ރުބެލައިޓް، ލެސޫކް، މެންހަޓަން ފިޝް މާކެޓް، ޔޫރޯ މާކެޓިންގ އަދި ޕިއްޒާ ކިޗެންގެ ފަރާތުން ވަނީ މި ޙަރަކާތަށް އެހީތެރިކަން ފޯރުކޮށްދީފައެވެ.
އެމް.އެން.ޔޫ.އެސް.ޔޫ އިން އައު ލީޑަރުންނަށް އަމާޒުކޮށްގެން ކުރިއަށްގެންދާ މިހަރަކާތަކީ އެމް.އެން،ޔޫ.އެސް.ޔޫގެ އެކިއެކި ހަރަކާތްތައް އައު ލީޑަރުންނަށް ކިޔައިދިނުމާއި، އެމް.އެން.ޔޫ.އެސް.ޔޫގެ މެންބަރުންނާއެކު އައު ލީޑަރުން ތަފާތު މާހައުލެއްގައި ވަގުތު ހޭދަކުރުމުގެ މަޤުސަދުގައި ބާއްވަމުން ގެންދާ ހަރަކާތެކެވެ.
