ސޮސައިޓީ ފޯރ ޝަރީއާ އެންޑް ލޯ (އެސް އެސް އެލް)، ހީލަރސް އަދި ނިއަރެސް ގުޅިގެން 2024 ވަނަ އަހަރުގެ ފުރަތަމަ ޓާމަށް ފެކަލްޓީ އޮފް ޝަރީއާ އެންޑް ލޯ (އެފް އެސް އެލް)، ސްކޫލް އޮފް ނަރސިން (އެސް.އެން) އަދި ފެކަލްޓީ އޮފް ހެލްތް އެންޑް ސައިންސް (އެފް.އެޗް.އެސް) އަށް އަލަށް ގުޅުނު ދަރިވަރުންނަށް ހާއްސަ ކޮށް ސްޓާރީ ނައިޓް ކުރިއަށް ގެންގޮސްފިއެވެ.
17 ފެބްެއަރީ 2024، ހޮނިހިރު ދުވަހުގެރޭ މެންހަޓަން ހޯލްގައި ކުރިޔަށް ގެންދުވުނު މި ހަރަކާތުގައި 3 ފެކަލްޓީގެ ކޯސްތަކަށް އަލަށް ގުޅުނު 80 ށްވުރެ ގިނަ ދަރިވަރުން ވަނީ ބައިވެރިވެފައެވެ.
ތިން ގޮފީގެ ހިންގާ ކޮމެޓީއިން އިސްނަގައިގެން، ތިން ގޮފީގެ އިސްވާރުންގެ އެހީތެރިކަމާއެކު ކުރިޔަށް ގެންދެވުނު މި ހަރަކާތަކީ ތިން ފެކަލްޓީގެ ކޯސްތަކަށް އަލަށް ގުޅުނު ދަރިވަރުންނަށް މަރުހަބާ ކިޔުމުގެ އިތުރަށް 3 ހިންގާ ކޮމިޓީގެ ހަރަކާތްތަކުގައި ބައިވެރިވާން ބޭނުންވާ އިސްވާރުންނަށް އެ ފުރުސަތު ތަނަވަސް ކޮށްދިނުމަށް ކުރިއަށް ގެންދެވުނު ހަރަކާތެކެވެ.
މި ހަރަކާތުގައި ސުކޫލް އޮފް ނާރސިންގެ ޑީން ވަނީ ބައިވެރިވެލައްވާފައެވެ. މީގެ އިތުރުން އެމް.އެން.ޔޫ.އެސްޔޫ ގެ މި ދައުރުގެ ހިންގާ ކޮމެޓީގެ މެންބަރުން ވަނީ ބައިވެރިވެލައްވާފައެވެ.
އެކުވެރި މާހައުލެއްގައި ކުރިޔަށް ގެންދެވުނު މި ހަރަކާތުގައި، އަލަށް ގުޅުނު ދަރިވަރުންނަށް، ތިން ގޮފީގެ ހިންގާ ކޮމެޓީ ތައާރަފުވެފައިވެއެވެ. ގިނަ ގޭމްތަކަކާއެކު ކުރިޔަށްގެންދެވުނު މި ހަރަކާތަށް ހުރިހާ ބައިވެރިންގެ ފަރާތުން ވަނީ ހޫނު ތަރުހީބެއް ލިބިގެން ގޮސްފައެވެ.
ވެލްކަމް ނައިޓާއެކު ތިން ގޮފީގެވެސް މި ޓާމުގެ ހަރަކާތްތައް ފެށިގެން ދިޔައިރު ތިން ގޮފީގެ ފަރާތުންވެސް މި ޓާރމުގައި ގިނަ ހަރަކާތްތަކެއް ކުރިޔަށް ގެންދިއުމަށް ނިންމާފައިވާކަމަށް ތިން ގޮފީގެ ހިންގާކޮމެޓީން މައުލޫމާތު ދެއެވެ.
