ފެކަލްޓީ އޮފް ހޮސަޕިޓާލިޓީ އެންޑް ޓުއަރިޒަމް ސްޓަޑީޒްގެ ގޮފި ޝެޓްސް އަށް އަލަށް ގުޅުނު އިސްވާރުންނަށް ހާއްސަކޮށް، ’ޝެޓްސް ނިއު ލީޑާސް ޓްރިޕް‘ ގެ ނަމުގައި ހާއްސަ ދަތުރެއް ގޮސްފިއެވެ. 24 ފެބްރުވަރީ 2024 ވީ ހޮނިހިރު ދުވަހު ވިލިމާލެއަށް ކުރި މި ދަތުރުގައި ޝެޓްސް 35 އިސްވާރުން ވަނީ ބައިވެރިވެފައެވެ.
މި ދަތުރަކީ ޝެޓްސް އަށް އަލަށް ގުޅުނު އިސްވާރުންނަށް ހާއްސަ ކޮށްގެން ޝެޓްސްގެ ހިންގާ ކޮމެޓީން ކުރިޔަށް ގެންދިޔަ ހަރަކާތެކެވެ. އަލަށް ގުޅުނު އިސްވާރުންގެ އިތުރަށް ނިމިދިޔަ އަހަރު ތަކުން ފެށިގެން ޝެޓްސްގެ ހަރަކާތްތަކުގައި ބައިވެރިވަމުން އަންނަ އިސްވާރުންނާއި ޝެޓްސްގެ ކުރީގެ ހިންގާ ކޮމެޓީ ތަކުގެ ބައެއް މެންބަރުން ވެސް ވަނީ މި ދަތުރުގައި ބައިވެރިވެފައެވެ.
މި ދަތުރަކީ ޝެޓްސްގެ އިސްވާރުންގެ ޓީމަށް އަލަށް ގުޅުނު އިސްވާރުންނާއި، ޝެޓްސްގައި މިހާރުވެސް ހަރަކާތްތެރިވަމުން އަންނަ އިސްވާރުންނާއި، ޝެޓްސްގެ ހިންގާކޮމެޓީގެ މެމްބަރުންގެ މެދުގައި އެއްބައިވަންތަކަށް އިތުރުކުރުމަށް ކުރިޔަށް ގެންދެވުނު ދަތުރެކެވެ.
ގިނަ ކުޅިވަރުތަކާއި މުނިފޫހިފިލުވުމުގެ ހަރަކާތްތައް ކުރިޔަށް ގެންދެވުނު މި ދަތުރު ކާމިޔާބުކަމާއެކު ނިންމާލެވުނު އިރު ކުރިޔަށް ހުރި ހަރަކާތްތަކުގައި ޝެޓްސްގެ ގިނަ އިސްވާރުން އެކުވެރިކަމާއިއެކު ފެންނާނެކަމަށް އުއްމީދުކުރެވެއެވެ.
2021 ވަނަ އަހަރުގެ ދެވަނަ ޓަރމް އިން ފެށިގެން ކޮންމެ ޓަރމެއްގައިވެސް ޝެޓްސްގެ އިސްވާރުންގެ ޓީމާ އަލަށް ގުޅޭ އިސްވާރުންނަށް ހާއްސަކޮށް ޝެޓްސް އިން އަންނަނީ ނިއު ލީޑާސ ޓްރިޕް ކުރިޔަށް ގެންދަމުންނެވެ.
