ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި އެމް.އެން.ޔޫ.އެސް.ޔޫގެ ގޮފި ސޮސައިޓީ ފޯރ ޝަރިޢާ އެންޑް ލޯ (އެސް.އެސް.އެލް) ގުޅިގެން ރަމަޟާން މަހު ކުރިއަށް ގެންދާ އެމް.އެން.ޔޫ.އެސް.ޔޫ – އެސް.އެސް.އެލް ޤުރްއާން ކިޔެވުމުގެ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.
މި އަހަރުގެ މުބާރާތުގައި ބައިވެރިވުމުގެ ފުރުސަތު ދިވެހިރާއްޖޭގެ ޤައުމީ ޔުނިވަރސިޓީގެ އެންމެހާ ދަރިވަރުންގެ އިތުރުން، އެހެން ކޮލެޖް/ޔުނިވަރސިޓީތަކަށް ނިސްބަތްވާ ދަރިވަރުންނަށް ވާނީ ހުޅުވާލެވިފައެވެ. ދިވެހިރާއްޖޭގެ ޤައުމީ ޔުނިވަރސިޓީ ނޫން އެހެން ކޮލެޖް/ޔުނިވަރސިޓީތަކަށް ޖުމްލަ 25 ޖާގައާއެކު މުބާރާތުގައި ބައިވެރިވުމުގެ ދަޢުވަތު ވާނީ މުބާރާތުގެ އިންތިޒާމް ކޮމިޓީއިން ވަކިން ފޮނުވައިފައެވެ.
މުބާރާތުގައި ބައިވެރިވުމަށް އެދޭ އެމް.އެން.ޔޫގެ ދަރިވަރުންނަށް އެސްއެސްއެލްގެ ޕޭޖުގައިވާ ގޫގްލް ފޯމް ފުރައިގެން ބައިވެރިވެވޭނެއެވެ. އެހެން ކޮލެޖް/ޔުނިވަރސިޓީތަކުގެ ދަރިވަރުން އެ ދަރިވަރަކު ނިސްބަތްވާ ކޮލެޖް/ޔުނިވަރސިޓީއެއްގެ ދަރިވަރުންގެ ޖަމިއްޔާ މެދުވެރިކޮށް ނަން ފޮނުވައިގެން މި މުބާރާތުގައި ބައިވެރިވެވޭނެއެވެ. މި އަހަރުގެ ޤުރުއާން މުބާރާތް ބޭއްވުމަށް ހަމަޖެހިފައިވަނީ މާރިޗު މަހުގެ 20-23 އަށެވެ. މުބާރާތުގައި ބަލައިގެން ކިޔެވުން އަދި ހިތުން ކިޔެވުމުގެ ފުރުސަތު ބައިވެރިންނަށް ވަނީ ހުޅުވާލެވިފައެވެ. ބަލައިގެން ކިޔެވުމުގެ މުޤައްރަރަކީ ފުރަތަމަ 15 ފޮތް ނުވަތަ ފަހު 15 ފޮތުންކުރެ އެ ބައިވެރިއަކު އިޚްތިޔާރުކުރާ ކޮޅެކެވެ. ހިތުން ކިޔެވުމުގެ މުޤައްރަރަކީ ފަހު 2 ފޮތް އެކަންޏެވެ. މި މުބާރާތުގައި ބައިވެރިވުމުގެ ފުރުސަތު ހުޅުވާލެވިފައިވަނީ މިމަހުގެ 11ވަނަ ދުވަހުގެ ރޭގަނޑު 23:59 ގެ ނިޔަލަށެވެ.
