2024 ވަނަ އަހަރުގެ ފުރަތަމަ ކުއާޓާގައި މެޑިކޯސްއިން ބޭއްވި ބްލަޑް ޑްރައިވް އަށް ބޮޑު ތަރުހީބެއް ލިބިއްޖެއެވެ.
މިދިޔަ ހޮނިހިރު ދުވަހު ބޭއްވުނު މިހަރަކާތުގައި އެކިއެކި ފެކަލްޓީތަކުން ޖުމްލަ 15 ދަރިވަރަކު ވަނީ ބައިވެރިވެފައެވެ. އެދުވަހުގެ މެންދުރު 11:00 އިން 13:30 އަށް ކުރިޔަށް ގެންދެވުނު މިހަރަކާތުގެ ތެރެއިން 4050 (ހަތަރު ހާސް ފަންސާސް) މިލިލީޓަރުގެ ލޭ ވަނީ ހަދިޔާ ކުރެވިފައެވެ. އެހެން އަހަރުތަކެކޭވެސް އެއްފަދައިން މިހަރަކާތް މިއަހަރުވެސް ބޭއްވިފައިވަނީ މޯލްޑިވިއަން ބްލަޑް ސާވިސަސް ގައެވެ.
”ރޯލް އަޕް ޔުއަރ ސްލީވްސް، ސޭވް އަ ލައިފް“ މި ޝިޢާރުގެ ދަށުން މެޑިކޯސް އިން ކުރިޔަށް ގެންދާ މި ބްލަޑް ޑްރައިވް އަކީ 2022 ވަނަ އަހަރުން ފެށިގެން ސިލްސިލާ ގޮތެއްގައި ކުރިޔަށް ގެންދެވޭ ހަރަކާތެކެވެ. އެގޮތުން ކޮންމެ އަހަރަކުވެސް 3 ކުއާޓާއަކަށް ބަހާލައިގެން މިހަރަކާތް ކުރިޔަށް ގެންދިޔުމަށް ވަނީ ހަމަޖެހިފައެވެ. މިހަރަކާތުގެ ތެރެއިން މުޅިން އަލަށް ލޭހަދިޔާ ކުރާ ގިނަ ފަރާތްތަކެއް އުފެދިގެން ދިޔުމަކީ މެޑިކޯސްގެ އެންމެ ބޮޑު އެއް އުއްމީދެވެ.
