ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ގޮފި ތަކުގެ މީޑިއާ ކޯޑިނޭޓަރުންނަށް އަމާޒުކޮށްގެން ސިލްސިލާކޮށް ބާއްވަމުން އަންނަ ޓްރެއިނިންގ ތަކުގެ ފުރަތަމަ ޓްރެއިނިންގ
ބާއްވައިފިއެވެ.
މި ޓްރެއިނިންގ ހާއްސަ ކުރެވިފައިވަނީ މާލޭގެ ކެމްޕަސްތަކުގައި ގާއިމު ކުރެވިފައިވާ 10 ގޮފީގެ މީޑިއާ ކޯޑިނޭޓަރުންނަށެވެ. މި ޓްރެއިނިންގައި މީޑިއާ ކޯޑިނޭޓަރުންގެ އިތުރުން ގޮފިތަކުގެ ހިންގާކޮމެޓީތަކުން ބައެއް މެމްބަރުންނާއިއެކު ޖުމުލަ 15 ފަރާތަކުން ވަނީ ބައިވެރވެފައެވެ.
16 މާރިޗް ވީ ހޮނިހިރު ދުވަހުގެ ރޭ އެމް.އެން.ޔޫ ސެންޓަރަލްގައި ކުރިއަށް ގެންދިޔަ މި ޓްރެއިނިންގ ނަގައި ދެއްވީ އެމް.އެން.ޔޫ.އެސް.ޔޫގެ ކުރީގެ ރައީސް މުހައްމަދު ޝާން އާމިރެވެ.
ޝާން ވަނީ ހަބަރު ލިޔުމާއި، ފޮޓޯ ނެގުމާއި، އެޑިޓުކުރުމުގެ އިތުރުން ވީޑިއޯގްރަފީ އާއި ބެހޭގޮތުން ބައިވެރިންނަށް މުހިންމު މައުލޫމާތުތަކެއް ހިއްސާކުރައްވާފައެވެ.
އަތޮޅުތެރޭގެ ގޮފި ތަކުގެ މީޑިއާ ކޯޑިނޭޓަރުންނަށް ޓްރެއިނިންގ އޮންލައިންކޮށް ބޭއްވުމަށް ހަމަޖެހިފައިވާއިރު، މި ފެށޭ ހަފްތާގެ ތެރޭގައި މި ޓްރެއިނިންގ ކުރިއަށް ގެންދިޔުމަށް ވަނީ ތާވަލުކުރެވިފައެވެ.
ޔޫނިއަންގެ މިދައުރުގެ ހިންގާ ކޮމެޓީގެ އަމާޒަކީ އެމް.އެން.ޔޫ.އެސް.ޔޫ މީޑިއާ ޓީމުން ގިނަ ހުނަރުވެރިންތަކެއް އުފެއްދުމެވެ.
