ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ސިލްސިލާކޮށް ބާއްވަމުން އަންނަ ވޮލީ ބޯޅަ މުބާރާތް ފަށައިފި އެވެ.
މިއަހަރުގެ މުބާރާތް ފެށުމުގެ ރަސްމިއްޔާތު ބާއްވާފައި ވަނީ، ބުދަ ދުވަހުގެ ރޭ ޕީއީ ހޯލުގައެވެ.
މުބާރާތް ފެށުމުގެ ރަސްމިއްޔާތު ޝަރަފުވެރިކޮށްދެއްވާފައިވަނީ ކުޅިވަރާއި ހަށިހެޔޮކަމާ ބެހޭ ވުޒާރާގެ ނައިބު އައިޝަތު ނާޒިމާއެވެ. އަދި މިރަސްމިއްޔާތުގައި ޤައުމީ ޔުނިވަރސިޓީގެ ވައިސް ޗާންސެލަރ ޑރ. އައިޝަތު ޝެހެނާޒް އާދަމްގެ އިތުރުން، ސީނިއަރ މެނޭޖްމެންޓް ބޭފުޅުން ވެސް ވަނީ ބައިވެރިވެފައެވެ. ހަމައެހެންމެ ޔޫނިއަންގެ ހިންގާ ކޮމެޓީ މެމްބަރުންނާއި، ކުރީ ދައުރުގެ މެމްބަރުން ވަނީ ބައިވެރިވެފައެވެ.
ކޮންމެ އަހަރަކު ވެސް ފޯރިގަދަ އެތައް މެޗެއް ފެނިގެންދާ މި މުބާރާތް ހުޅުވާލެވިފައި ވަނީ އެމް.އެން.ޔޫގެ ފެކަލްޓީ/ސެންޓަރ/ކެމްޕަސްތަކަށެވެ.
މިއަހަރުގެ މުބާރާތުގައި އަންހެން އަދި ފިރިހެން ޑިވިޝަނުގައި 9 ޓީމާއެކު، ޖުމުލަ 18 ޓީމު ވާދަކުރާނެއެވެ. ވޭތުވެދިޔަ އަހަރު ފިރިހެން ޑިވިޝަނުގެ ފައިނަލުގައި ސެންޓަރ ފޯ ފައުންޑޭޝަން ސްޓަޑީޒްގެ މައްޗަށް ކުރިހޯދައި މުބާރާތުގެ ޗެމްޕިއަންކަން ހޯދާފައިވަނީ ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ އިންނެވެ. އަދި ފެކަލްޓީ އޮފް ހެލްތް ސައިންސަސް ބަލިކޮށް އަންހެން ޑިވިޝަނުގެ ތަށި އުފުލާލީ ސްކޫލް އޮފް ނާރސިންގ ޓީމެވެ.
މުބާރާތް ފެށުމުގެ ގޮތުން، ލެގަސީ ޝީލްޑް މެޗެއް ކުޅުމަށް ވަނީ ހަމަޖެހިފައެވެ. މުބާރާތަށް މުޅިން އަލަށް ތައާރަފްކުރާ މި މެޗުގައި ވާދަކުރާނީ މިދިޔަ އަހަރުގެ ފައިނަލްގައި ވާދަކުރި ދެޓީމެވެ.
އިންޓަރ ފެކަލްޓީ ވޮލީ މުބާރާތަކީ ޔޫނިއަނުން ބާއްވަމުން އަންނަ ދެވަނައަށް އެންމެ ބޮޑު ކުޅިވަރު ހަރަކާތެވެ. މިއަހަރުގެ މުބާރާތަކީ މީގެ 10 ވަނަ މުބާރާތެވެ. މުބާރާތް ކުރިއަށްދާނީ މެއި އެއް ވަނަ ދުވަހުން ފެށިގެން 11 ވަނަ ދުވަހުގެ ނިޔަލަށެވެ.
