ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)އިން ފުރަތަމަ ފަހަރަށް އިނގިރޭސި ބަހުސް މުބާރާތެއް ބޭއްވުމަށް ނިންމައިފި އެވެ.
މި މުބާރާތް ކުރިއަށް ގެންދިއުމަށް ނިންމާފައިވަނީ ޖޫންމަހުގެ ތެރޭގައެވެ.
މި މުބާރާތުގެ މަޤްޞަދަކީ ދަރިވަރުންގެ މެދުގައި ވާހަކަދެއްކުންތެރިކަމުގެ ހުނަރު އިތުރުކޮށް، ޢިލްމީ ގޮތުން ބަހުސްކުރުމުގެ މަންސައެއް ފަހިކުރުމެވެ. އެގޮތުން، ކޮލެޖް/ޔުނިވަރސިޓީތަކަށާއި މަތީ ތަޢުލީމު ފޯރުކޮށްދޭ ސްކޫލްތަކަށްވެސް މި މުބާރާތުގައި ބައިވެރިވުމުގެ ފުރުޞަތު ވަނީ ހުޅުވާލާފައެވެ.
މި މުބާރާތުގައި ބަހުސްކުރެވޭނީ ތިމާވެއްޓާއި، މަސްވެރިކަމާއި، މޫސުމީ ބަދަލުތަކާއި، އާޓިފިޝަލް އިންޓެލިޖެންސް އަދި މީސްމީޑިއާފަދަ މައްސަލަތަކާގުޅޭ ގޮތުންނެވެ.
މި މުބާރާތުގައި ބައިވެރިވުމުގެ ސުންގަޑިއަކީ 1 ޖޫން 2024ވާ ހޮނިހިރު ދުވަހެވެ. މުބާރާތުގައި ބައިވެރިވާ ޓީމުތަކުގެ ޢަދަދަށް ބަލާފައި މުބާރާތް ކުރިއަށްގެންދެވޭނީ ގްރޫޕް ނުވަތަ ލީގު އުސޫލަށް ބަހާލައިގެންނެވެ.
މުބާރާތުގައި ބައިވެރިވުމަށް އޮންލައިން ފޯމެއް ހުށަހެޅުމުގެ ފުރުޞަތު ފަހިވެފައިވާއިރު، 7743991 އަށް ގުޅައިގެން މަޢުލޫމާތު ސާފުކުރެވޭނެއެވެ.
އެމް.އެން.ޔޫ.އެސް.ޔޫ އިން އަންނަނީ ސިލްސިލާކޮށް ދިވެހި ބަހުސް މުބާރާތެއް ބާއްވަމުންނެވެ. މިއީވެސް ދަރިވަރުންގެ ހުނަރުތައް ފަހިކޮށް، ފުޅާ މަންސައެއްގައި ހުނަރު ދެއްކުމުގެ ބޭނުމުގައި ކުރިއަށް ގެންދެވޭ މުބާރާތެކެވެ.
