2024 ގެ ދެވަނަ ސެމިސްޓަރގެ ހަރަކާތްތައް ފެއްޓުމުގެ ގޮތުން ބިޒްނަސް ސްކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ) އިން ދިވެހި ފުލުހުންގެ ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓާއި ގުޅިގެން ޓީމް ބިލްޑިންގ ހަރަކާތެއް ބޭއްވުމަށް ވަނީ ނިންމާފައެވެ.
މި ހަރަކާތް ބޭއްވިގެންދާނީ އޮގަސްޓް 31 ވާ ހޮނިހިރު ދުވަހު ވިލިމާލޭގައެވެ. އެމް.އެން.ޔޫ ހުރިހާ ކުދިންނަށް ހުޅުވާލައިގެން ކުރިއަށް ގެންދާ މިހަރަކާތުގެ މައިގަނޑު މަގުޞަދަކީ ބައިވެރިންގެ ޓީމް ވޯރކް ނުވަތަ ގުޅިގެން އެންމެން އެކަތި ގަނޑެއްގެ ގޮތުގައި މަސައްކަތްކުރުމުގެ މުހިންމުކަމާއި، މި ހުނަރު ތަރައްގީ ކުރުމަށް އެހީވެދިނުމެވެ.
މި ހަރަކާތާއި ގުޅޭގޮތުން މަޝްވަރާ ބައްދަލުވުމެއް، ބީ.އެސް.އެސް.އޭގެ ހިންގާ ކޮމެޓީގެ މެމްބަރުންނާއި ދަރިވަރުންގެ ޔޫނިއަންގެ މެމްބަރުން އަދި ދިވެހި ފުލުހުންގެ ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓްގެ ބޭފުޅުންނާއެކު އޮގަސްޓް 4 ވީ އާދިއްތަ ދުވަހު އެމް.އެން.ޔޫ ސެމިނަރ ރޫމުގައި ވަނީ ބާއްވާފައެވެ.
މި ބައްދަލުވުމުގައި މި ހަރަކާތް ރޭވިފައިވާ ގޮތާއި އިދާރީ ކަންތައްތައް ކުރިއަށްގެންދާނެ ގޮތާއި ގުޅޭގޮތުން މަޝްވާރާތައް ކުރެވުނެވެ. އަދި މި ހަރަކާތުން ދަރިވަރުންނަށް ލިބިގެންދާނެ އެކިކަހަލަ މަންފާތައްވެސް ވަނީ ހިއްސާ ކުރެވިގެން ގޮސްފައެވެ. އަދި ހަމައެއާއެކު ކުރިއަތް އޮތްތާންގައި ދެ ފަރާތުން ގުޅިގެން ކުރިއަށް ގެންދެވިދާނެ ހަރަކާތްތަކާއި ގުޅޭގޮތުންވެސް ވަނީ ހިޔާލު ބަދަލުކުރެވިފައެވެ.
މި ހަރަކާތުގައި އެމް.އެން.ޔޫގެ ހުރިހާކުދިންނަށް ބައިވެރިވުމުގެ ފުރުޞަތު ވަނީ ހުޅުވާލެވިފައެވެ. ހަރަކާތުގައި ބައިވެރިވުމަށް އެދޭ ފޯމް ބީ.އެސް.އެސް.އޭގެ ފޭސްބުކު ޕޭޖުން އަދި ދަރިވަރުންނާއެކު ހެދިފައިވާ ވައިބާ ގުރޫޕް ތަކުން ފެންނަން ހުންނާނެއެވެ. ވީހާވެސް ގިނަކުދިން މި ހަރަކާތުގައި ބައިވެރިވުމާކީ ބީ.އެސް.އެސް.އޭގެ ވަރަށް ބޮޑު އެދުމެކެވެ.
ބީ.އެސް.އެސް.އޭ އިން ވަނީ މީގެ ކުރިންވެސް މިފަދަ ވޯރކްޝޮޕް ތަކާއި ތަމްރީނުތައް އެކި ފަރާތްތަކާއި ގުޅިގެން ކާމިޔާބުކާމއެކު ކުރިއަށްގެން ގޮސްފައެވެ.
