މިހާރު ކުރިއަށްދާ ބީ.އެމް.އެލް އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ އަންހެން ޑިވިޝަނުގެ މެޗުތައް ކުޅެވިގެން ދިޔައިރު، މޯލްޑިވަސް ބިޒްނަސް ސްކޫލް (އެމް.ބީ.އެސް) އާއި ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) ބައްދަލުކުރި މެޗުން 17-00 ގެ ނަތީޖާއަކުން މޮޅުވެ، އެމް.ބީ.އެސް އިން މުބާރާތުގެ ފެށުން ވަރުގަދަ ކޮށްފިއެވެ.
މިއަދު ހަވީރު ހުޅުމާލެ ރެހެނދި ދަނޑުގައި ވަނީ އަންހެން ޑިވިޝަނުގެ 4 މެޗެއް ކުޅެފައެވެ. ގުރައުންޑް އެކެއްގައި ކުޅެވުނު ފުރަތަމަ މެޗުގައި ބައްދަލުކުރީ ސްކޫލް އޮފް ނާރސިންގ (އެސް.އެން) އާއި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް)އެވެ. އެސް.އެންގެ ޓީމުން ވަނީ މި މެޗު 05-00 ގެ ނަތީޖާއަކުން އެފް.އެސް.އެލްގެ މައްޗަށް ކުރިހޯދާފައެވެ. މިމެޗުގެ މޮޅު ކުޅުންތެރިޔަކަށް ހޮވިފައިވަނީ އެސް.އެން ޓީމުގެ ޖާޒީ ނަމްބަރ 05 މަރިޔަމް ޝަހާއެވެ.
ގުރައުންޑް ދޭއްގައި ކުޅެވުނު މެޗުގައި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) އަދި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) ވާދަކުރި މެޗު ވަނީ 00-00 ން އެއްވަރުވެފައެވެ. ދެ ޓީމުގެ ފަރާތުން ވެސް މޮޅު ކުޅުމެއް ފެނިގެންދިޔަ މިމެޗުގެ މޮޅުކުޅުންތެރިޔަކަށް ހޮވިފައިވަނީ އެފް.އެޗް.އެސްގެ ކީޕަރ ޖާޒީ ނަމްބަރ 23 މަރިޔަމް ރިޝްމާއެވެ.
އެފް.އެޗް.އެސް އަދި އެމް.ބީ.އެސް ބައްދަލުކުރި މެޗުގައި ބޮޑު ތަފާތަކުން އެމް.ބީ.އެސްގެ ޓީމުން މެޗު ކާމިޔާބުކުރިއިރު، މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެމް.ބީ.އެސް ޓީމަށް ގިނަ ގޯލުތަކެއް ކާމިޔާބުކޮށްދިން އެޓީމުގެ ޖާޒީ ނަމްބަރ 09 ފާތިމަތު ސައިނާއެވެ. މި މެޗުގެ ނަތީޖާއަކީ 17-00 އެވެ.
މިއަދު ހަވީރު ކުޅެވުނު ފަހު މެޗު ކުޅެވިފައިވަނީ އެމް.އައި ކޮލެޖާއި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އާއި ދެމެދުއެވެ. 05-01 ގެ ނަތީޖާއަކުން ސީ.އެފް.އެސްގެ ޓީމުން އެމް.އައި ކޮލެޖުގެ މައްޗަށް ކުރިހޯދި، މި މެޗުގެ މޮޅު ކުޅުންތެރިޔަކަށް ހޮވިފައިވަނީ ސީ.އެފް.އެސްގެ ޖާޒީ ނަމްބަރ 22 ޖަފްނާ އީސާއެވެ.
މި މުބާރާތުގެ ފިރިހެން ޑިވިޝަނުގެ 08 މެޗު މިރޭ ކުޅުމަށްވަނީ ހަމަޖެހިފައެވެ. އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ތައުލީމީ ދާއިރާއަށް ހުޅުވާލެވިގެން ކުރިއަށްގެންދާ އެންމެ ބޮޑު ކުޅިވަރު ހަރަކާތެވެ. މިއަހަރު ކުރިއަށް މިދަނީ ޔޫނިއަންގެ 10 ވަނަ ފުޓްސަލް ފިއެސްޓާއެވެ. އެގޮތުން މި މުބާރާތް ކުރިއަށްގެންދިޔުމަށް އެކި ފަރާތްތަކުގެ އެހީތެރިކަމާއި އެއްބާރުލުން ލިބެމުންދާއިރު، މިފަހަރު މުބާރާތުގެ ޓައިޓަލް ސްޕޮންސަރަކީ ބެންކް އޮފް މޯލްޑިވްސްއެވެ.
