ބީ.އެމް.އެލް އެމް.އެން.ޔޫ.އެސް.ޔޫ ފުޓްސަލް ފިއެސްޓާގައި މިރޭ ކުޅެވިގެންދިޔަ ގުރޫޕް ބީގެ ފެކަލްޓީ އޮފް އެޑިއުކޭޝަން (އެފް.އީ) އަދި މިމުބާރާތުގެ އެންމެ ފަހުގެ ޗެމްޕިއަންކަމުގައިވާ އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) ބައްދަލުކުރި މެޗު، އެފް.އީ އިން ބީ.އެސްގެ މައްޗަށް ކުރިހޯދައި ގުރޫޕުގެ އެއްވަނައިގައި ހަމަޖެހިލައިފިއެވެ.
ހުޅުމާލެ ރެހެނދި ދަނޑުގައި ކުރިއަށްދިޔަ މެޗުތަކުގައި ފުރަތަމަ ގުރައުންޑްގައި ކުޅެވިފައިވަނީ މެޕްސް ކޮލެޖު އަދި ސްކޫލް އޮފް ނާރސިންގ (އެސް.އެން)ގެ މެޗެވެ. މެޕްސް ކޮލެޖުން މި މެޗު 05-03 ގެ ނަތީޖާއަކުން ވަނީ މެޗު ކާމިޔާބުކޮށްފައެވެ. މެޕްސްގެ ޖާޒީ ނަމްބަރ 07 ޖަމްޝާދު ޖައުފަރު ވަނީ މި މެޗު މެޕްސް އަށް ކާމިޔާބު ކޮށްދިނުމުގައި އިސްރޯލެއް އަދާކޮށްފައެވެ. އަދި މެޗުގެ މޮޅު ކުޅުންތެރިޔާގެ މަގާމުވެސް ހާސިލްކޮށްފައިވަނީ ޖަމްޝާދެއެވެ.
ގުރައުންޑް ދޭއްގައި އެފް.އީ އަދި ބީ.އެސް ބައްދަލުކުރި ފޯރިގަދަ މެޗުގައި ދެ ޓީމުގެ ފަރާތުންވެސް ވަނީ މޮޅު ކުޅުމެއް ފެނިގެން ގޮސްފައެވެ. އެފް.އީ މި މެޗުން މޮޅުވެފައިވަނީ 02-00 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެފް.އީގެ ޖާޒީ ނަމްބަރ 10 ރައުހާން ރިއްފަތުއެވެ.
މިރޭ ގުރޫޕް ބީ ގެ އިތުރުން ގުރޫޕް އޭގެ ދެ މެޗެއް ކުޅެވުނު އިރު، ގުރައުންޑް އެކެއްގައި ބައްދަލުކޮށްފައިވަނީ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) އަދި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް)އެވެ. އެފް.އެޗް.ޓީ.އެސްގެ ކޮޅަށް 06 ލަނޑު ޖަހައި ސީ.އެފް.އެސް އިން ވަނީ 06-03 ގެ ނަތީޖާއަކުން މެޗު ކާމިޔާބުކޮށްފައެވެ. މި މެޗުގެ މޮޅު ކުޅުންތެރިޔާގެ މަގާމު ހާސިލްކޮށްފައިވަނީ ސީ.އެފް.އެސްގެ ޖާޒީ ނަމްބަރ 10 މުހައްމަދު އަލީއެވެ.
މިރޭގެ ފަހު މެޗުގައި ބައްދަލުކުރީ އިސްލާމިކް ޔުނިވަރސިޓީ އޮފް ދި މޯލްޑިވްސް (އައި.ޔޫ.އެމް) އާއި ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލަޖީ (ފެސްޓް)އެވެ. ވާދަވެރި ކުޅުމެއް ފެނިގެންދިޔަ މި މެޗުގައި ފެސްޓް މޮޅު ކޮށްދިން ލަނޑު އެޓީމަށް ކާމިޔާބު ކޮށްދީފައިވަނީ ޖާޒީ ނަމްބަރ 05 މޫސާ މާހީއެވެ. 01-00 ގެ ނަތީޖާ އަކުން މެޗު ނިމުނުއިރު، މޮޅު ކުޅުންތެރިޔާގެ މަގާމު ހާސިލްކޮށްފައިވަނީ ފެސްޓް ޓީމުގެ ޖާޒީ ނަމްބަރ 08 އަބްދުﷲ ފައިޒާންއެވެ.
މި މުބާރާތުގެ ގުރޫޕް ސްޓޭޖުގެ އެންމެ ފަހު މެޗުތައް މާދަމާ ކުޅުމަށް ވަނީ ހަމަޖެހިފައެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ތައުލީމީ ދާއިރާއަށް ހުޅުވާލެވިގެން ކުރިއަށްގެންދާ އެންމެ ބޮޑު ކުޅިވަރު ހަރަކާތެވެ. މިއަހަރު ކުރިއަށް މިދަނީ ޔޫނިއަންގެ 10 ވަނަ ފުޓްސަލް ފިއެސްޓާއެވެ.
