ސޮސައިޓީ އޮފް ޝަރީޢާ އެން ލޯ (އެސް.އެސް.އެލް) އިން އިންތިޒާމް ކޮށްގެން ކުރިޔަށް ގެންދިޔަ ޤާނޫނީ ޕްރެޒެންޓޭޝަން ހުށަހެޅުމުގެ މުބާރާތް ވަރަށް ކާމިޔާބު ކަމާއިއެކު ނިންމައިލައިފިއެވެ.
މި މުބާރަތަކީ މި އަހަރު މުޅިން އަލަށް އެސް.އެސް.އެލް ގެ އިސްނެގުމާއެކު، އެފް.އެސް.އެލްގެ ދަރިވަރުންނަށް ހުޅުވައިލައިގެން ކުރިޔަށް ގެންދިޔަ ޢިލްމީ މުބާރާތެކެވެ.
މި މުބާރާތް ހިންގުމުގެ މައިގަނޑު އެއް މަޤުސަދަކީ، ފެކަލްޓީގެ ގިނަ ދަރިވަރުންގެ ތަޢުލީމީ ރޮނގަކީ ޤާނޫނީ ދާއިރާކަމަށް ވެފައި، ވާހަކަދެއްކުމުގެ ހުނަރަކީ މި ދަރިވަރުންގެ ކިބައިގައި އަށަގަނެފައިހުރުން މުޙިއްމު ހުނަރަކަށް ވުމާއެކު، ޚާއްޞަކޮށް ޤާނޫނަށް ޙަވާލީދީ ވާހަކަ ދެއްކުންތެރިކަމަކީ މުޙިއްމުކަމަކަށްވީއިރު، ދަރިވަރުންގެ ކިބައިގައި މި ހުނަރު ދިރުވައި ކުރިއެރުވުމެވެ.
މި މުބާރަތުގެ ނިންމުމުގެ ރަސްމިއްޔާތު ޝަރަފުވެރިކޮށްދެއްވީ ފެކަލްޓީ އޮފް ޝަރީޢަ އެންޑް ލޯގެ ޑީން ޑރ. ޢަބްދުއްސައްތާރު ޢަބްދުއްރަޙްމާންއެވެ. މީގެ އިތުރުން ޚާއްޞަ މެހެމާނުންގެ ގޮތުގައި އެސް.އެސްއެލް ގެ ކުރީގެ ރައީސުން އަދި ޔޫނިއަންގެ ހިންގާ ކޮމިޓީގެ މެންބަރުން ބައިވެރިވެފައިވެއެވެ.
ޖުމްލަ 4 ޓީމަކުން ބައިވެރިވި މި މުބާރަތުގެ ފަޚުރުވެރި 1 ވަނަ ހާޞިލް ކުރީ ’ޓީމް ސެމް 6‘ އެވެ. އަދި 2 ވަނައަށް ހޮވިފައިވަނީ ’އެކްސްކޯ 24‘ އެވެ. މި މުބާރާތުގެ އެންމެ މޮޅު 5 ހުށަހެޅުންތެރިން ހޮވާފައިވާއިރު، އެންމެ މޮޅުހުށަހެޅުން ތެރިޔާގެ މަގާމު ޙާޞިލްކުރީ ބެޗެލަރ އޮފް ޝަރީޢާ އެންޑް ލޯ ސެމް 6 ގެ ދަރިވަރު، ޢާއިޝަތު ނަޒުފާ އިރުޝާދެވެ.
ކާމިޔާބު ކަމާއެކު ކުރިޔަށް ދިޔަ މި މުބާރާތް ނިންމާލުމުގެ ރަސްމިއްޔާތު ޝަރަފުވެރިކޮށް ވާހަކަފުޅުދައްކަވަމުން މިފަދަ ޢިލްމީ ޙަރަކާތްތަކުގައި ދަރިވަރުންގެ ބައިވެރިވުމަކީ މުޙިއްމުކަމެއް ކަމުގައި ޑީން ފާހަގަ ކުރެއްވިއެވެ. އަދި ކާމިޔާބީ އަކީ މަސައްކަތްތެރިންގެ ޙައްޤެއްކަމާ، ކަންކަމުގައި ކުރިއަރައި ދިޔުމުގައި އެއްމެ މުޙިއްމީ އެކުއްޖެއްގެ ވިސްތެރިކަންކަމާ، އަދި ހުރިހާ ކުދިންވެސް ފައިދާހުރިކަންކަމުގައި ކުރިއަރައި ދިޔުމަށް ގަދައަޅައި މަސައްކަތް ކުރުމަށް ހިތްވަރުދެއްވައި، ނަޞޭހަތްދެއްވިއެވެ.
