މިއަދު ލީޑަރުންނަށްވެތިބެ މި ނަގާ ޒިންމާތަކަކީ އަޅުގަނޑުމެންގެ މުސްތަޤްބަލް ބައްޓަންކުރާނޭކަމަކަށް ވެގެންދާނެ ކަމަށް ސޮސައިޓީ ފޯރ ޝަރީޢާ އެންޑް ލޯ (އެސް.އެސް.އެލް)ގެ ރައީސް އާއިޝަތު ރާޔާ ވިދާޅުވެއްޖެ އެވެ.
ރާޔާ މިފަދައިން ވިދާޅުވީ، އެމް.އެން.ޔޫ.އެސްޔޫ.ގެ ގޮފިތަކުގެ ހިންގާ ކޮމެޓީ އަށް އިންތިޚާބުވި މެމްބަރުންނަށް މަޤާމުގެ މަސްއޫލިއްޔަތު ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ރާޔާ ވިދާޅުވީ، ލީޑަރޝިޕަކީ ހަމައެކަނި މަޤާމެއްވެސް ފުރުމެއް ނޫންކަމަށާއި، އެއީ ޒިންމާ ނެގުމާއި، އެ ޒިންމާ ނެގުމުގައި އެކިއެކި ގޮންޖެހުންތަކާ ކުރިމަތިލުމާއި، އެއް ވިސްނުމަކަށް ނުވަތަ ތަޞައްވުރަކަށް ދިއުމަށް ޓީމަކާއެކީ މަސައްކަތްކޮށް ޓީމަށް މަގުދެއްކުން ކަމަށެވެ.
މީގެއިތުރުން، ޔޫނިއަނުން ލީޑަރޝިޕްގެ ހުނަރުތައް ދަސްކޮށްދޭކަމަށާއި، އެކިއެކި ޙަރަކާތްތައް އަމިއްލައަށް އިންތިޒާމުކުރާނެ ގޮތް ދައްކައިދީ، ހުނަރުތައް ތަރައްޤީކުރުމުގެ ފުރުޞަތު ޔޫނިއަނުން ދޭ ކަމަށް ރާޔާ ވަނީ ވިދާޅުވެފައެވެ.
ރާޔާ ވަނީ ދަރިވަރުން ޙަވާލުވި މަޤާމުތަކުގެ ފަހަތުގައި ބޮޑު ޒިންމާއެއް ވާ ކަމަށާއި، ޤާބިލުކަން ހުރި މިންވަރަކުން ޚިދުމަތްކޮށް މަޤާމުގެ ޒިންމާ ނަޒާހަތްތެރިކަމާއެކީ އަދާކުރުމަށް ނަޞޭޙަތްތެރިވެފައެވެ.
ނިމިދިޔަ ފެބުރުވަރީމަހުގެ 23ވަނަ ދުވަހު ފެކަލްޓީގެ ގޮފިތައް އިފްތިތާހުކުރެވިގެންދިޔައިރު، އަތޮޅުތެރޭ ގޮފިތަކުގެ ތެރެއިން ދޮންދީނި ގޮފި އިފްތިތާޙުކުރުމުގެ ރަސްމިއްޔާތު ވަނީ 7 މާރިޗުގައި ބާއްވާފައެވެ.
