ބިޒްނަސް ސުކޫލް ސްޓޫޑެންޓް އެސޯސިއޭޝަން (ބީ.އެސް.އެސް.އޭ) އިން އެހެން އަހަރުތަކެކޭވެސް އެއްފަދައިން މިއަހަރުގެ ރަމަޟާން މަހުގައިވެސް ކުރިއަށްގެންދާ އެމް.އެން.ޔޫ.އެސް.ޔޫ – ބީ.އެސް.އެސް.އޭ ފީފާ މުބާރާތް މާޗް މަހުގެ 10 ވަނަ ދުވަހު ފަށައިފިއެވެ.
މިއަހަރު މިމުބާރާތުގައި ބައިވެރިވުމަށް ހުޅުވާލި ފުރުސަތުގައި އެކި ފެކަލްޓީތަކުން ވަނީ ގިނަ ދަރިވަރުންތަކެއް ބައިވެރިވެފައެވެ. އެމް.އެން.ޔޫގެ ހުރިހާ ދަރިވަރުންނަށް ބައިވެރިވުމުގެ ފުރުސަތު ހުޅުވާލައިގެން ކުރިއަށްގެންދާ މި މުބާރާތުގައި މިފަހަރު އެހެން އަހަރުތަކާއި ތަފާތުކޮށް މިމުބާރާތް ބާއްވަން ހަމަ ޖެހިފައިވަނީ ހަމައެކަނި ފިރިހެން ދަރިވަރުންގެ މެދުގައެވެ.
45 ދަރިވަރުންނާއި އެކު މި މުބާރާތް ފަށައިގެން ކުރިއަށްދާއިރު، މިއަހަރު ފީފާ ޓޯނަމެންޓް ކުރިއަށް ގެންދަން ހަމަޖެހިފައިވަނީ އެކި ބުރުތަކަށް ބަހާލައިގެންނެވެ. އެގޮތުން ސިންގަލް އެލިމިނޭޝަންގެ ރައުންޑް އޮފް 32 އާއި ރައުންޑް އޮފް 16 ގެ އިތުރުން ކުއާޓާ ފައިނަލް ކުޅެވިގެންދާނެއެވެ. މިބައިން މޮޅުވާ ދަރިވަރުންގެ މެދުގައި ސެމީ އަދި ފައިނަލްވެސް ކުޅެވިގެންދާނެ އެވެ.
މިއީ ވަކިވަކި ދަރިވަރުންގެ މެދުގައި ކުޅެން ހަމަޖެހިފައިވާ މުބާރާތަކަށްވާއިރު، މުބާރާތުގެ އެންމެ މޮޅު ކުޅުންތެރިޔާ އަށް ފައިސާގެ ގޮތުގައި 500 ރުފިޔާގެ އިނާމެއް ދޭން ހަމަ ޖެހިފައިވެއެވެ. އަދި ދެވަނަ އެންމެ މޮޅު ކުޅުންތެރިޔާއަށް ގިފްޓް ހެމްޕާއެއް ދޭންވެސް ވަނީ ހަމަޖެހިފަ އެވެ.
ގިނަ ދަރިވަރުންތަކެއްގެ ތަރުހީބާއެކު ފޯރިގަދަކޮށް ބާއްވަމުން އަންނަ އެމް.އެން.ޔޫ.އެސް.ޔޫ – ބީ.އެސް.އެސް.އޭ ފީފާ މުބާރާތަކީ 2019 ވަނަ އަހަރުން ފެށިގެން ކުރިއަށްގެންދާ ކާމިޔާބު މުބާރާތެކެވެ.
