ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ) އިން އިންތިޒާމުކޮށްގެން އަންހެނުންގެ ދުވަސް ފާހަގަ ކުރުމުގެ ގޮތުން ކުރިޔަށް ގެންދިޔަ ”އަންބައުންޑް: ވުމަން ހޫ އިންސަޕަޔަރ“ ކާމިޔާބުކަމާއެކު ނިންމާލައިފިއެވެ.
މި ހަރަކާތް ފެށުމުގެ ގޮތުން 8 މާރިޗު ވީ ހޮނިހިރު ދުވަހު ވަނީ އިންސްޓަގްރާމްގައި ޕޯސްޓްތަކެއް އާއްމުކޮށްފައެވެ. މި ޕޯސްޓްތަކުގައި ވަނީ ރާއްޖޭގެ މަޝްހޫރު އިންފްލުއެންސަރުންގެ ވާހަކަތައް ވަރަށް ކުރުކޮށް ގެނެސްދީފައެވެ.
މީގެ އިތުރުން 9 މާރިޗުން 13 މާރިޗުގެ ނިޔަލަށް ”މަމްސް އެއިޑް“ އާއި ގުޅިގެން ވަނީ ޑޮނޭޝަން ޑްރައިވެއް ކުރިޔަށް ގެންގޮއްސައެވެ. މި ހަރަކާތް ގެންގޮސްފައިވަނީ ކޮންމެ ރެއަކު 9 އަކުން 11 އަށެވެ. މި ހަރަކާތް ކުރިޔަށް ގެންގޮސްފައިވަނީ އެމް.އެން.ޔޫ ސެންޓްރަލް އަދި އުސްފަސްގަނޑު ސަރަޙައްދުގައެވެ. މި ހަރަކާތަކީ ފެސާގެ އިސްވާރުން އިސްނަގައިގެން އެކަނިވެރި މައިންނަށްޓަކައި ކުރިޔަށް ގެންދެވުނު ހަރަކާތެކެވެ. މި ހަރަކާތް ނިމުނުއިރު 2877.89 ދިވެހި ރުފިޔާ ވަނީ ލިބިފައެވެ. މީގެ އިތުރުން، ކުޑު ކުދިންގެ އަންނައުނާއި، ކުޅޭސާމާނު، ކިރު ދަޅު އަދި ފައިވާން ފަދަ ތަކެތި ވަނީ ލިބިފައެވެ.
މި ހަރަކާތުގެ މަޤްޞަދަކީ އަންހެނުންގެ ދުވަހާ ގުޅިގެން އެކަނިވެރި މައިންނަށް އެހީތެރިވެ ދިނުމެވެ.
ފެސާގެ އިސްވާރުންގެ ފަރާތުން މި ހަރަކާތް ކުރިޔަށް ގެންދިޔުމަށް ލިބުނު އެއްބާރުލުމާއި އެހީތެރިކަން ކުރިޔަށް ހުރި ހަރަކާތްތަކުގައި ވެސް ލިބިގެންދާނެ ކަމަށް ފެސާއިން އުއްމީދުކުރެއެވެ.
