އެމް.އެން.ޔޫ ބިޒްނަސް ސްކޫލުގައި ގާއިމު ކުރެވިފައިވާ ގޮފި ބިޒްނަސް ސްކޫލް ސްޓޫޑެންޓްސް އެސޯސިއޭޝަން (ބީ.އެސް.އެސް.އޭ) އިން ފުލުހުންނާއި ގުޅިގެން ޓީމް ބިލްޑިން ހަރަކާތެއް ކުރިއަށް ގެންގޮސްފިއެވެ.
ސެޕްޓެމްބަރު 27ވީ ހޮނިހިރު ދުވަހު ވިލިމާލޭގެ ޕޮލިސް ބީޗުގައި ކުރިއަށް ގެންދެވުނު މިހަރަކާތައް ވަނީ ދަރިވަރުންގެ ފަރާތުން ބޮޑު ތަރުހީބެއް ލިބިގެންގޮސްފައެވެ. މި ހަރަކާތް ކުރިއަށް ގެންގޮސްފައިވަނީ ހެނދުނު 9 އިން ހަވީރު 4 ޖަހަންދެންނެވެ.
އެންމެ ފުރަތަމަ ކަމަކަށް ހެނދުނު ދަންފަޅީގައި ކުރިއަށް ގެންދިޔައީ އަމަލީ ހަރަކާތްތަކެކެވެ. މި އިން ކޮންމެ ހަރަކާތަކީވެސް ދަރިވަރުންނަށް އޭގެއިން ތަފާތު ފިލާވަޅުތަކެއް ލިބިގެން ދިޔަ ހަރަކާތެކެވެ. އަދި އެހަރަކާތެއް ނިންމާލުމަށްފަހު އޭގެ މަގްސަދު ވަރަށް ތަފްސީލުކޮށް ފުލުން ދިޔައީ ކުދިންނަށް ކިޔައިދެމުންނެވެ. ދަރިވަރުންނަށްވަނީ މަޖާ ކުރުމުގެ އިތުރުން އެތައް ފިލާވަޅުތަކެއް ދަސްވެގެންގޮއްސައެވެ.
މެންދުރުފަހުގެ ދަންފަޅީގައި އޮތީ މައުލޫމާތު ދިނުމުގެ ސެޝަނެކެވެ. މި ސެޝަން ނަންގަވައިދެއްވީ މޯލްޑިވްސް ޕޮލިސްގެ ހެޑް އޮފް ޕަބްލިކް ޓްރަސްޓް އެންޑް ކޮންފިޑެންސް މެޏޭޖްމެންޓުގެ ފަރާތުން ފާތިމަތު ނަޝްވާއެވެ. މި ސެޝަންގައި ދަރިވަރުންނަށް ޔުނިވާސިޓީގައި އުޅޭއިރު ދިމާވެދާނެ އެތައް ކަމެއްގައި އަމަލުކުރާނެ ގޮތުގެ މުހިންމު ކަންތައްތަކެއް ކިޔައިދީފައިވެއެވެ.
ދަރިވަރުން އުފާވެރިކަމާއިއެކު ބައިވެރިވެ ކާމިޔާބުކަމާއިއެކު ނިމިގެން މިދިޔަ ހަރަކާތަކީ ދަރިވަރުންނަށް ފުލުހުންގެ މަސައްކަތާއި ބެހޭ މައުލޫމާތު ދިނުމާއި، ދަރިވަރުން ހޭލުންތެރިކުރުމާއި، އިސްނެގުމުގެ ހުނަރުގެ އިތުރުން ފުލުހުންނާއި އާންމު ރައްޔިތުންނާއި ދެމެދު އޮންނަ ގުޅުން ބަދަހިކުރުމަށް ބޭއްވުނު ހަރަކާތެކެވެ. މިފަދަ އިތުރު ހަރަކާތްތައް އެމް.އެން.ޔޫ.އެސް.ޔޫ އާއި ގުޅިގެން ބީ.އެސް.އެސް.އޭ އިން މުސްތަގުބަލުގައި މިއަށްވުރެ ފުރިހަމަކޮށް ބޭއްވުމަކީ ބީ.އެސް.އެސް.އޭގެ އަމާޒެވެ.
