މިއަހަރުގެ ފުރަތަމަ ސެމިސްޓާގައި ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ލީޑާސް ގްރޫޕާއި ގުޅުނު ދަރިވަރުންނަށް ބޭއްވި ”ލީޑާސް ނައިޓް 2026“ ކާމިޔާބުކަމާއެކު ނިންމާލައިފިއެވެ.
ފެބުރުވަރީ 6ވަނަ ދުވަހު އެމް.އެން.ޔޫ ޕީ.އީ ހޯލުގައި ކުރިޔަށްދިޔަ މި ހަރަކާތުގައި 100 އަށްވުރެ ގިނަ އައު ލީޑަރުން ވަނީ ބައިވެރިވެފައެވެ.
މި ހަރަކާތުގައި ލީޑާސް ގްރޫޕާ އަލަށް ގުޅުނު ދަރިވަރުންނަށް އެމް.އެން.ޔޫ.އެސް.ޔޫގެ 14 ވަނަ ދައުރުގެ ހިންގާ ކޮމެޓީ މެމްބަރުންގެ ތައާރަފެއް ވަނީ ދީފައެވެ. އަދި އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެމްބަރުންނާއި، ކުރީ ދައުރުތަކުގެ ބައެއް މެމްބަރުން ވަނީ މި ހަރަކާތުގައި ބައިވެރިވެފައެވެ.
މި ހަރަކާތުގައި ވާހަކަ ދައްކަވަމުން އެމް.އެން.ޔޫ.އެސް.ޔޫގެ ރައީސް މުޙައްމަދު ޢަޔާޝް ޢަލީ ވަނީ އަލަށް ލީޑާސް ގްރޫޕާއި ގުޅުނު ދަރިވަރުންނަށް މަރުހަބާ ކިޔާފައެވެ. އަދި ކުރިޔަށް އޮތް ތަނުގައި އެމް.އެން.ޔޫ.އެސް.ޔޫގެ ހަރަކާތްތަކުން އައު ލީޑަރުން ފެނިގެންދާނެ ކަމަށް އުންމީދު ކުރައްވާ ކަމަށް އަޔާޝް ވިދާޅުވިއެވެ.
މި ހަރަކާތުގައި ދިރާގުގެ ފަރާތުން އަގުހުރި އިނާމުތައް ދީފައިވާއިރު، ލެވެންޑަރ، ލެސޫކް، ލެވޭވް، މެންހަޓަން ފިޝް މާކެޓް މާލެ، ބްލޭޑް ސެލޫން، އަދި ޕިއްޒާ ކިޗެންގެ ފަރާތުން ވަނީ ވައުޗަރު ދީފައެވެ.
އެމް.އެން.ޔޫ.އެސް.ޔޫއިން ކޮންމެ އަހަރަކުވެސް ބާއްވަމުން ގެންދާ ލީޑާސް ނައިޓަކީ އެމް.އެން.ޔޫ.އެސް.ޔޫ އިން ހިންގަމުން ގެންދާ ހަރަކާތްތައް އައު ލީޑަރުންނަށް ކިޔައިދިނުމަށާއި، އެމް.އެން.ޔޫ.އެސް.ޔޫގެ މެމްބަރުންނާއެކު އައު ލީޑަރުން މަޖާ މަހައުލެއްގައި ހޭދަކުރުމުގެ މަގުސަދުގައި ބާއްވަމުން ގެންދާ ހަރަކާތެކެވެ.
