ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބޭއްވި ”13ވަނަ އެމް.އެން.ޔޫ.އެސް.ޔޫ ބަހުސް މުބާރާތުގެ ފަޚުރުވެރި އެއްވަނަ މި އަހަރުވެސް ފެކަލްޓީ އޮފް ޝަރީޢާ އެންޑް ލޯގެ ޓީމުން ކާމިޔާބުކޮށްފިއެވެ.
މި އަހަރުގެ ބަހުސް މުބާރަތް ކުރިއަށްގޮސަފައިވަނީ 14 ޖޫން އިން ފެށިގެން 22 ޖޫންގެ ނިޔަލަށެވެ. މުބާރާތުގެ ނިންމުމުގެ ރަސްމިއްޔާތު ކުރިއަށްގޮސްފައިވަނީ މި މަހުގެ 22 ވަނަ ދުވަހުގެ ރޭ، އެމް.އެން.ޔޫ ސެންޓަލް އޮޑިޓޯރިމއަމްގައެވެ. އަދި މިރަސްމިއްޔާތު ޝަރަފުވެރި ކޮށްދެއްވާފައިވަނީ ފަންނާއި ސަގާފަތާއިތަރިކައާ ބެހޭ ވަޒީރު ހީނާ ވަލީދެވެ.
މި އަހަރުގެ މުބާރާތުގެ ފައިނަލް ބަހުސް ކޮށްފައިވަނީ 2025 ވަނަ އަހަރުގެ މުބާރާތުގެ ޗެމްޕިއަން ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އަދި 2024 ވަނަ އަހަރުގެ މުބާރާތުގެ ޗެމްޕިއަން ސްކޫލް އޮފް މެޑިސިން (އެސް.އެމް) އިންނެވެ. މި ބަހުސްގައި އެސް.އެމް އިން 849.5 މާރކްސް ހޯދާފައިވާއިރު، ޖުމުލަ 1047.5 ޕޮއިންޓާއެކު އެފް.އެސް.އެލް އިން ވަނީ މި ބަހުސް ކާމިޔާބުކޮށް މުބާރާތުގެ ފަޚުރުވެރި އެއްވަނަ ހާޞިލްކޮށްފައެވެ. މި ބަހުސް ގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އެސް.އެލްގެ އަހްމަދު އަލާއު އިސްމާޢީލްއެވެ.
މުބާރާތުގައި އެންމެ މޮޅު ފަސް ބަހުސްކުރުންތެރިންގެ އިނާމު ހާޞިލް ކޮށްފައިވަނީ އެފް.އެސް.އެލްގެ ޓީމުން އަރުޝަމް ޢަބްދުﷲ، އަޙްމަދު އަލާއު އިސްމާއިލް އަދި މުޙައްމަދު ރައުޝަން، އެސް.އެމް ޓީމުން އިން ނާއިފާ ޢަބްދުﷲ އަދި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) އިން ފާތިމަތު ނީޒާއެވެ. މުޅި މުބާރާތުގެ އެންމެ މޮޅު ބަހުސްކުރުންތެރިޔާގެ ލަގަބު ހާޞިލްކޮށްފައިވަނީ އަޙްމަދު އަލާއު އިސްމާއިލެވެ.
މި އަހަރުގެ މުބާރާތުގައި ވާހަކަދެއްކުމުގެ ހުނަރަށް ޝައުގުވެރިކަން ހުންނަ ކުދިންނަށް ހާއްސަކޮށް މި މުބާރާތުގެ ތެރެއިން ވާހަކަދެއްކުމުގެ ބައެއް ތަޢާރަފުކޮށް މި ބައިން ވަނަތައް ހާޞިލްކޮށްފައިވާ ބައިވެރިންނަށް ވެސް މި ހަފްލާގައި އިނާމު ހަވާލުކޮށްފައިވެއެވެ. މުބާރާތުގެ ވާހަކަދެއްކުމުގެ ބައިން 3 ވަނަ އެސް.އެމްގެ އަޙްމަދު ޢަބްދުﷲ ހާޞިލްކޮށްފައިވާއިރު 2 ވަނަ ހާޞިލްކޮށްފައިވަނީ އެފް.އެސް.އެލްގެ އަހްމަދު އަލާއު އިސްމާޢީލްއެވެ. އަދި ވާހަކަދެއްކުމުގެ ބައިން ފަޚުރުވެރި އެއްވަނަ ޙާޞިލްކޮށްފައިވަނީ ފެކަލްޓީ އޮފް އެޑިއުކޭޝަން (އެފް.އީ)ގެ ޢާއިޝާ އަޙްމަދެވެ.
13ވަނަ އެމް.އެން.ޔޫ ބަހުސް މުބާރާތް ވެގެންދިޔައީ އެފް.އެސް.އެލް ޓީމަށާއި ޓީމުގެ ވަކި ވަކި ބައިވެރިންނަށް ވެސް ނުހަނު ކާމިޔާބު މުބާރާތަކަށެވެ. ޖުމުލަ 10 ޓީމަކުން ބައިވެރިވި މި މުބާރާތް ކުރިއަށް ގެންގޮސްފައިވަނީ އެމް.އެން.ޔޫގެ ފެކަލްޓީތަކުގެ އިތުރުން މަތީ ތަޢުލީމުދޭ އެހެނިހެން މުއައްސަސާތަކަށްވެސް ހުޅުވާލައިގެންނެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ޔޫނިއަނުން ކުރިޔަށް ގެންދާ ހަރަކާތްތަކުގެ ތެރެއިން، އެންމެ ޝަރަފުވެރި އަދި އެންމެ ގިނަދުވަސްވީ އެއް މުބާރާތެވެ. މިމުބާރާތުގެ ޒަރިއްޔާއިން ވާހަކަދެއްކުންތެރިކަމުގެ ފަންނުގައި ހުނަރުވެރި އަދި ރާއްޖޭގައި ފާހަގަކޮށްލެވޭ ފަދަ ގިނަ ޒުވާނުންތަކެއް ވަނީ މުޖުތަމަޢުގެ ތެރެޔަށް ނެރެދީފައެވެ. ޔޫނިއަންގެ އަމާޒަކީ ކުރިޔަށް އޮތް ތަނުގައި މިމުބާރާތް މިހާރަށް ވުރެ ފުޅާކޮށް އިތުރަށް ފުރިހަމަކުރުމެވެ.
