ދިވެހިރާއްޖޭގެ ގައުމީ ޔުނިވާސިޓިގެ ދަރިވަރުންގެ ޔޫނިއަނުން އިންތިޒާމުކޮށްގެން ބާއްވާ 4 ވަނަ އެމް.އެން.ޔޫ.އެސް.ޔޫ އިންޓަރ-ފެކަލްޓީ ބެޑްމިންޓަން މުބާރާތް 2026 ބުރާސްފަތި ދުވަހުގެ ހަވީރު ފަށައިފިއެވެ. އެހެން އަހަރުތަކެކޭ އެއްފަދައިން މިއަހަރުގެ މުބާރާތް ވެސް ކުޅެވިގެންދާނީ އެފް.އީ ޕީއީ ހޯލުގައެވެ.
މިއަހަރުގެ މުބާރާތުގައި ޖުމްލަ 11 ޓީމެއް ބައިވެރިވެފައިވެއެވެ. އެގޮތުން މިއަހަރުގެ މުބާރާތުގައި މުޅިން އަލަށް ކޮލެޖް އޮފް ފިޝަރީޒް އެންޑް އޯޝަން ސައިންސަސް (ސީ.އެފް.އޯ.އެސް) ގެ ޓީމެއް ވަނީ ބައިވެރިވެފައެވެ. މިއާއެކު މިއަހަރުގެ މުބާރާތް ވެގެންދާނީ މިހާތަނަށް އެންމެ ގިނަ ޓީމުތައް ވާދަކުރާ މުބާރާތަށެވެ.
މީގެ އިތުރުން މިއަހަރުގެ މުބާރާތުގައި މުޅިން އަލަށް ސިންގަލްސް ކެޓަގަރީ ވެސް ވަނީ ތަޢާރަފުކުރެވިފައެވެ. އެގޮތުން ވިމެންސް ސިންގަލްސް އަދި މެންސް ސިންގަލްސްގެ ކެޓަގަރީ ތަޢާރަފު ކުރެވިފައިވާއިރު، ކޮންމެ ކެޓަގަރީއެއްގައިވެސް 32 ކުޅުންތެރިންނަށް ބައިވެރިވުމުގެ ފުރުސަތު ވަނީ ހުޅުވާލެވިފައެވެ. އަދި މިފަހަރު މިފުރުސަތު ހުޅުވާލެވިފައިވަނީ ޓީމް އިވެންޓުގައި ކުޅޭ ކުޅުންތެރިންނަށް އެކަންޏެވެ.
މުބާރާތުގެ އެންމެ ފުރަތަމަ މެޗުގައި ބުރާސްފަތި ދުވަހުގެ ހަވީރު ބައްދަލުކޮށްފައިވަނީ ސްކޫލް އޮފް ނާސިންގ (އެސް.އެން) އަދި ފެކަލްޓީ އޮފް ހެލްތު ސައިންސަސް (އެފް.އެހް.އެސް)ގެ ޓީމެވެ. މި މެޗު 4-1ގެ ނަތީޖާއަކުން ކާމިޔާބުކުރީ އެސް.އެން އިންނެވެ. ދެވަނަ މެޗުގައި ރޭ ބައްދަލުކޮށްފައިވަނީ ކޮލެޖް އޮފް ފިޝަރީޒް އެންޑް އޯޝަން ސައިންސަސް (ސީފޯސް) އާއި ފެކަލްޓީ އޮފް އެންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް) އެވެ. މި މެޗު 4-1ގެ ނަތީޖާއަކުން ކާމިޔާބުކުރީ ފެސްޓުންނެވެ. ތިންވަނަ މެޗުގައި ސްކޫލް އޮފް މެޑިސިނން އާއި ފެކަލްޓީ އޮފް އާޓްސް ބައްދަލުކުރި މެޗު 2-3ގެ ނަތީޖާއަކުން ސްކޫލް އޮފް މެޑިސިންއިން ކާމިޔާބުކޮށްފައިވާއިރު، ހަތަރުވަނަ މެޗުގައި ސެންޓަރ ފޯރ ފައުންޑޭޝަން ސްޓަޑީޒް އާއި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް ބައްދަލުކކުރި މެޗު 4-1ގެ ނަތީޖާއަކުން ކާމިޔާބުކޮށްފައިވަނީ ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް އިންނެވެ. ރޭގގެ އެންމެ ފަހު މެޗެއްގެ ގޮތުގައި ކުޅެފައިވަނީ ފެކަލްޓީ އޮފް އެޑިއުކޭޝަނާއި ފެކަލްޓީ އޮފް ޝަރީޢާ އެންޑް ލޯއެވެ. މި މެޗު 5-0ގެ ނަތީޖާއަކުން ކާމިޔާބުކޮށްފައިވަނީ ފެކަލްޓީ އޮފް އެޑިއުކޭޝަނުންނެވެ.
މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ސެޕްޓެންބަރު 24އިން އޮކްޓޫބަރު 3ގެ ނިޔަލަށެވެ. ސިންގަލްސް ކެޓެގަރީގެ މެޗުތައް ކުޅެވިގެންދާނީ ޓީމް އިވެންޓް ނިމުމަށްފަހު އޮކްޓޫބަރު 2 އަދި 3ވަނަ ދުވަހުގައެވެ.
