ދިވެހިރާއްޖޭގެ ގައުމީ ޔުނިވާސިޓީގެ ދަރިވަރުންގެ ޔޫނިއަނުން އިންތިޒާމުކޮށްގެން ކުރިޔަށް ގެންދިޔަ އެމް.އެން.ޔޫ.އެސް.ޔޫ އިންޓަރފެކަލްޓީ ބެޑްމިންޓަން މުބާރާތް 2026 ގެ ގެ ޗެމްޕިއަންކަމުގެ ޝަރަފު ފެކަލްޓީ އޮފް ހެލްތު ސައިންސަސް އިން ހޯދައިފިއެވެ.
ވާދަވެރި ފައިނަލ މެޗު ކާމިޔާބުކޮށް އެފް.އެޗް.އެސް އިން މުބާރާތުގެ ތަށި އުފުލާލާފައިވަނީ އެމް.އެން.ޔޫ ބިޒްނަސް ސްކޫލާ އާ ބައްދަލުކޮށް 3-2 ގެ ނަތީޖާއަކުންނެވެ. މިމެޗުގެ މެންސް ޑަބަލްސް، މެންސް ސިންގަލްސް، އަދި މިކްސްޑް ޑަބަލްސްގެ ޓައިތައް ކާމިޔާބުކޮށްފައިވަނީ ފެކަލްޓީ އޮފް ހެލްތު ސައިންސަސްގެ ޓީމުންނެވެ.
މީ މި މުބާރާތުގައި އެފް.އެޗް.އެސް އަދި އެމް.އެން.ޔޫ ބީ.އެސް ވެސް ފައިނަލް ކުޅުނު ފުރަތަމަ ފަހަރެވެ. އަދި މި ދެ ޓީމު ވެސް ފައިނަލަށް ދަތުރުކޮށްފައިވަނީ މުބާރާތުގައި ކުޅުނު ހުރިހާ މެޗެއް ކާމިޔާބުކޮށްގެންނެވެ. މި އަހަރުގެ މުބާރާތުގައި މާލޭ ކެމްޕަހުގެ ހުރިހާ ފެކަލްޓީއަކުން ވާދަކުރިއިރު، މުބާރާތް ކުރިޔަށް ގެންދެވިފައިވަނީ ތިން ގްރޫޕަކަށް ބަހާލެވިގެންނެވެ. ގްރޫޕު ސްޓޭޖަށް ފަހު ޓީމުތަކުގެ މެދުގައި ކުއާޓަރ ފައިނަލް އަދި ސެމީ ފައިނަލް މެޗުތައް ވަނީ ކުޅެވިފައެވެ. ސެމީ ފައިނަލުގައި ނާކާމިޔާބުވެ މުބާރާތުގެ 3 ވަނަ ލިބިފައިވަނީ ސްކޫލް އޮފް ނާރސިންގ އަދި ފެކަލްޓީ އޮފް އެޑިއުކޭޝަނަށެވެ.
އެމް.އެން.ޔޫ.އެސް.ޔޫ އިންޓަރފެކަލްޓީ ބެޑްމިންޓަން މުބާރާތަކީ 2023 ވަނަ އަހަރުން ފެށިގެން ޔޫނިއަނުން ސިލްސިލާ ގޮތެއްގައި ކުރިޔަށް ގެންދާ މުބާރާތެކެވެ. މިއީ މިމުބާރާތް ސިލްސިލާ ގޮތެއްގައި ކުރިޔަށް ގެންދާ 4 ވަނަ އަހަރެވެ. މި އަހަރުގެ މުބާރާތައް ޓީމް އިވެންޓްގެ އިތުރުން ސިންގަލްސް އިވެންޓެއް ވެސް ވަނީ ތަޢާރަފު ކުރެވިފައެވެ. މި އިވެންޓް ކުރިއަށް ދާނީ އޮކްޓޫބަރު މަހުގެ 2ވަނަ އަދި 3ވަނަ ދުވަހުގައެވެ.
