އެމް.އެން.ޔޫ.އެސް.ޔޫގެ ސ.ހިތަދޫ ކެމްޕަހުގެ ގޮފި، ”ދޮންދީނި“ އަށް 2025ވަނަ އަހަރު އިންތިޙާބުވި މެމްބަރުންނަށް މަޤާމުގެ ލިޔުން ހަވާލުކޮށްފިއެވެ.
ދޮންދީނި ގޮފި އިފްތިތާޙު ކޮށްފައިވަނީ މާރިޗު 07ވަނަ ދުވަހުގެރޭ އެމް.އެން.ޔޫ ހިތަދޫ ކެމްޕަހުގައި ބޭއްވުނު ޚާއްސަ ރަސްމިއްޔާތެއްގައެވެ. މިރަސްމިއްޔާތު ޝަރަފްވެރިކޮށްދެއްވާފައިވަނީ ހިތަދޫ ކެމްޕަސްގެ މެނޭޖަރ ޙައްވާ ޒަރީނާއެވެ.
ހިންގާކޮމިޓީގެ މެމްބަރުންނަށް މަޤާމް ހަވާލުކުރުމުގެ އިތުރުން ޝަރަފުވެރި މެޙްމާނު ވަނީ ރަސްމިއްޔާތުގައި ވާހަކަފުޅު ދައްކަވާފައެވެ. ހަމައެހެންމެ، އެމް.އެން.ޔޫ.އެސް.ޔޫގެ ރައީސްގެ އިތުރުން ދޮންދީނި ގޮފީގެ ރައީސްކަމަށް އިންތިޚާބުވި އާއިޝަތު އަނަމް އަޝްރަމް އާއި ކުރީގެ ރައީސް ފާތިމަތު ނަދާ ވަނީ ވާހަކަފުޅު ދައްކަވާފައެވެ.
މި ރަސްމިއްޔާތުގައި ކުރީގެ ހިންގާ ކޮމިޓީގެ މެންބަރުންނަށް ރިފަރެންސް ލެޓަރ ޙަވާލުކޮށްދެއްވާފައިވަނީ ހިތަދޫ ކެމްޕަހުގެ އެސިސްޓެންޓް ޑިރެކްޓަރު މަރިޔަމް އަހްމަދެވެ. އަދި އިސްވާރުންނަށް ލީޑަރސް އެވޯޑް ޙަވާލުކޮށްދެއްވާފައިވަނީ ދޮންދީނި ގޮފީގެ ކުރީގެ ރައީސް ޠާއިފް މަޖީދެވެ.
ހަމައެހެންމެ، ވޮލިންޓިއަރ އެވޯޑް ހާޞިލުކުރި ދަރިވަރުންނަށް އެވޯޑް ޙަވާލުކޮށްދެއްވާފައިވަނީ ދޮންދީނި ގޮފީގެ ކުރީގެ ރައީސް އިސްމާޢިލް ނަޢީމެވެ.
ދޮންދީނިއަކީ މިއަހަރުގެ އެމް.އެން.ޔޫ.އެސް.ޔޫގެ އަތޮޅުތެރޭ ކެމްޕަސްތަކުން އިފްތިތާޙުވި ފުރަތަމަ ގޮތްޕެވެ. މި ގޮފީގެ ޙަރަކާތްތަކުގައި ކުރީގެ ހިންގާ ކޮމިޓީތަކުގެ މެންބަރުން ޙަރަކާތްތެރިވަމުން އަންނައިރު، ނިމިދިޔަ އަހަރު ބޭއްވި އެސް.އެސް.އެލް-ދޮންދީނި އައްޑޫ ބޮޑުފަނޑިޔާރުތަކުރުފާނުގެ ހަނދާނީ ވާދައިގެ ތައްޓަށް ބޭއްވި ވާހަކަދެއްކުމުގެ މުބާރާތުގެ ކަންތައްތަކުގައިވެސް ގޮފީގެ ކުރީގެ ރައީސް ޠާއިފް އާއި އިސްމާޢިލް ވަނީ ބައިވެރިވެފައެވެ.
އެމް.އެން.ޔޫ ހިތަދޫ ކެމްޕަހުގައި އެމް.އެން.ޔޫ.އެސް.ޔޫގެ ގޮތްޕެއް ޤާއިމް ކުރެވިފައިވަނީ 2018ވަނަ އަހަރުގައެވެ.
