ޔޫތު ލީޑާރސް ނެޓްވޯކްގެ ފަރާތުން ބާއްވާ ޒުވާން ލީޑަރުންގެ ފޯރަމްގައި އެސްޓާގެ ރައީސް މަރިޔަމް ހުވައިނާ ޙަސަން ނ. ވެލިދޫ ދަތުރުގައި ބައިވެރިވެއްޖެއެވެ.
އެސްޓާގެ ރައީސް ހުވައިނާއަކީ މި ފޯރަމްގެ އިވެންޓް މެނޭޖަރެވެ. މިދިޔަ އަހަރުވެސް ހުވައިނާ ވަނީ ވައި.އެލް.އެންގެ އެކި ފޯރަމްތަކުގައި އިވެންޓް މެނޭޖަރެއްގެ ގޮތުގައި ޙަރަކާތްތެރިވެފައެވެ. އެގޮތުން ހުޅުމާލޭގައި ބޭއްވި ފޯރަމުގައިވެސް އިވެންޓް މެނޭޖަރުގެ ގޮތުގައި ޙަރަކާތްތެރިވެފައިވެއެވެ. މިއީ ހުވައިނާ އިވެންޓް މެނޭޖަރުގެ މަޤާމު އަދާކުރާ ދެވަނަ ދައުރެވެ.
މިއީ ޔޫތު ލީޑާރސް ނެޓްވޯކްއިން ބާއްވާ ސިލްސިލާ ފޯރަމްތަކުގެ ތެރެއިން މިއަހަރު ބޭއްވި ފުރަތަމަ ފޯރަމެވެ. ނ. ވެލިދޫގައި ކުރިއަށްދިޔަ މި ފޯރަމްގައި ނޫނު އަތޮޅުން ޖުމްލަ 80 ދަރިވަރުން ބައިވެރިވެފައިވެއެވެ. މި ފޯރަމަކީ ސްޓޭޓް މިނިސްޓަރުންނާއި ސަރުކާރުގެ އިސް މަޤާމުތަކުގެ ބޭފުޅުންވެސް ބައިވެރިވި ފޯރަމެކެވެ. ފޯރަމްގެ ޙަރަކާތްތަކުގައި އެހީތެރިވުމުގެ ގޮތުން އެމް.އެން.ޔޫ އެސް.ޔޫ ލީޑާރސް ގްރޫޕުގެ 6ކުދިން ބައިވެރިވެފައިވެއެވެ.
ޔޫތު ލީޑާރސް ނެޓްވޯކްގެ ފޯރަމްތަކަކީ ހަރުދަނާ ޒުވާނުން ބިނާކުރުމުގެ މަޤްޞަދުގައި ބާއްވަމުންދާ ސިލްސިލާ ފޯރަމްތަކެކެވެ. އަދި މުޖުތަމަޢު ބިނާކުރުމަށްޓަކައި މުހިއްމު މަޢުލޫމާތުތަށް މިފޯރަމްގެ ޒަރީޢާއިން ފޯރުކޮށްދެމުންދެއެވެ. މިއަހަރު މާލޭގައިވެސް ޔޫތު ލީޑާރސް ނެޓްވޯކްގެ ފޯރަމެއް ބޭއްވުމަށް ވަނީ ހަމަޖެހިފައެވެ.
ލިޔުނީ: އައިމިނަތު ޝީޒާ
މީޑިއާ ކޯޑިނޭޓަރ
އިންޖިނިއަރިންގ ސައިންސް އެންޑް ޓެކްނޮލޮޖީ އެސޯސިއޭޝަން (އެސްޓާ)
