ފެކަލްޓީ އޮފް އިންޖިނިއަރިން ސައިންސް އެންޑް ޓެކްނޮލޮޖީ (ފެސްޓް)ގެ ސްޓޫޑެންޓް ޔޫނިއަންގެ ގޮފި އެސްޓާ އަދި ފެކަލްޓީ އޮފް ހެލްތު ސައިންސް (އެފް.އެޗް.އެސް)ގެ ސްޓޫޑެންޓް ޔުނިއަން ގެ ގޮފި ހީލަރސް ގުޅިގެން ޔުރީކާގެ ނަމުގައި ސައިންސް އެކްސްޕޯއެއް ބޭއްވުމަށް ތައްޔާރީތައް ފަށައިފިއެވެ.
ޔުރީކާ! އެކްސްޕޯ އަކީ ދިވެހިރާއްޖޭގެ ގައުމީ ޔުނިވާސިޓީ ގެ ދެ ފެކަލްޓީ ކަމައްވާ ފެސްޓް އާއި އެފް.އެޗް.އެސްގެ ދަށުން ހިންގޭ ކޯސްތަކުގެ މަޢުލޫމާތު ދަރިވަރުންގެ ނަޒަރިއްޔާތުން އެހެނިހެން ދަރިވަރުންނަށް ފޯރުކޮށްދިނުމާއި ކޯސްތަކާމެދު ދަރިވަރުން އަހުލުވެރިކުރުވުމުގެ ގޮތުން ހިންގޭ މައުލޫމާތު ދިނުމުގެ އެކްސްޕޯއެކެވެ. މި ގޮތުން ކޮންމެ ފެކަލްޓީ އަކުން ހިންގާ ކޯސްތައް ތަމްސީލުކުރާ ސްޓޯލްތައް މި އެކްސްޕޯގައި ހިމެނިގެންދާނެއެވެ. މީގެ އިތުރުން، މި އެކްސްޕޯގައި ސްޓޯލް ތައްޔާރުކުރަން ބޭނުންވާ ފެކަލްޓީތަކަށް އެ ފުރުސަތުވެސް ވަނީ ހުޅުވާލެވިފައެވެ.
މި އެކްސްޕޯ ކުރިޔަށް ދާނީ 31 އޯގަސްޓް 2022 ވާ ބުދަ ދުވަހު އެފް.އެޗް.އެސްގެ އިންޑޯ ހޯލުގައެވެ. ހަތަރު ދަންފަޅިއަކަށް ބަހާލެވިފައިވާ މިއެކްސްޕޯ ކުރިއަށް ދާނީ ބުދަ ދުވަހުގެ ހެނދުނު 09:00 އިން ރޭގަނޑު 21:00 އަށެވެ.
މިއެކްސްޕޯ އަކީ ދިވެހިރާއްޖޭގެ ޤައުމީ ޔުނިވާރސިޓީގައި ހިންގޭ މިފަދަ ފުރަތަމަ ހަރަކާތެވެ.
