ހީލާސްގެ ފަރާތުން ނަގައިދިން ޕާސަނަލް ހައިޖީން ސެޝަން ކުރިއަށް ގޮސްފައިވަނީ މިއަދު މެންދުރު 12:00 ޖެހިއިރު ފެކަލްޓީ އޮފް އެޑިއުކޭޝަންގެ އޮޑިޓޯރިއަމް ގައެވެ. ހިރިޔާ ސްކޫލްގެ އެތިކްސް ކްލަބްގެ ގާތްގަނޑަކަށް 30 ވަރަކަށް ދަރިވަރުން މި ސެޝަން ގައި ބައިވެރިވެފައިވެއެވެ.
ސެޝަން ފެށުމުގެ ކުރިން އެންމްއެންޔޫއެސްޔޫގެ ގޮފިތަކުގެ ނައިބުރައީސް އަލީ ޝަމްއޫން ދަރިވަރުންނާއި މުޙާތަބުކޮށް ވާހަަކަ ދެއްކެވިއެވެ. އަދި އެންމްއެންޔޫއެސްޔޫގެ ލީޑާސް ގްރޫޕްގެ ތަޢާރަފަކަށް ފަހު އެންމްއެންޔޫގެ ދަރިވަރުންގެ ޔޫނިއަން އާއި ޔޫނިއަންގެ ގޮފިތަކުގެ ކުޑަ ތަޢާރަފެއްވެސް ދިނެވެ.
ޕާސަނަލް ހައިޖީންގެ ސެޝަން ފަށައިދީފައިވަނީ ހީލާސްގެ ހިންގާކޮމެޓީގެ އެކަޑަމިކް ނައިބްރައީސް އަޙްމަދް މަޒީދެވެ. މަޒީދު ވަނީ ސިއްޙަތަކީ ކޮބައިކަން ދަރިވަރުންނަށް ކިޔައިދީފައެވެ. އަދި އަމިއްލަ ސާފުތާހިރުކަމުގެ މުހިންމުކަމާއި، ސާފުތާހިރުވުމަށް ކުރެވިދާނެ ކަންތައްތައްވަނީ ހިލާސްގެ ފަރާތުން ދެން މި ސެޝަން ނަގައިދިނުމަށް ބައިވެރިވި އަބްދުﷲ ރަމީޒު ކިޔައިދީފައެވެ. މި ސެޝަން ކުރިޔަށް ގެންގޮސްފައިވަނީ ބައިވެރިންނާ ވަރަށް އެކުވެރި މާހައުލެއްގައި އެކުދިންގެ މަޝްވަރާއާއި ޚިޔާލުތައްވެސް ހިމަނައިގެންނެވެ. ހީލާސްގެ މި ސެޝަން ނިންމާލީ ބައިވެރިވި ކުދިންނަށް ދަސްވިއެއްޗެހި އެކުދިންގެ ފަރާތުން ކިޔައިދިނުމަށްފަހުއެވެ. ކުދިންނަށް ކިޔައިދިން ސެޝަން ކުރިޔަށް ގެންދިޔަގޮތާއި މެދު ހިިތް ހަމަ ޖެހޭކަމަށް އެކުދިންގެ ޚިޔާލު ހޯދާލުމުން އެނގުނެވެ.
