ހެލްތް ޕްރޮޓެކްޝަން އެޖެންސީއިން ކުރިއަށް ގެންދާ ރޯޑް ސޭފްޓީ ކެމްޕެއިން ގައި އެންމެ ފުރަތަމަ ހަރަކާތަކަށް ހުކުރުދުވަހު ހަވީރު ބޭއްވި ހިނގާލުމުގައި ހީލާރސް އިންވަނީ ސްކިޓެއް ހުށައަޅައިދީފައެވެ. ސްކިޓްގައި ދައްކައިދިނީ އެކްސިޑެންޓްވެގެން އުޅޭ ތަނެއްގައި މިހާރު މި މުޖުތަމައުގައި އާންމުން އަމަލުކުރާ ގޮތެވެ. މި ސްކިޓްގެ ބޭނުމަކީ އެކްސިޑެންޓެއް ދިމާވާ ހާލަތެއްގައި ވާ ބަޔެއްގެ ފޮޓޯނަގާ މީސްމީޑިއާގައި ފެތުރުމުގެ ބަދަލުގައި އެމިހަކަށް ވެވެން އޮތް އެހީއެއް އެބަޔަކަށް ފޯރުކޮއްދިނުމަށް އާންމުން ހޭލުންތެރިކުރުވުމެވެ.
މިފަހަރުގެ ރޯޑް ސޭފްޓީ ކެމްޕެއިންގެ ޝިއާރަކީ ”ފުރާނައިގެ ސަލާމަތައް އަޑު އުފުލަމާ“ (”ސޭވް ލައިވްސް، ސްޕީކް އަޕް“) އެވެ. ރޯޑް ސޭފްޓީ ވީކް ކުރިޔަށް ގެންދަން ހަމަޖެހިފައިވަނީ 11 ޖޫން އިން ފެށިގެން 17 ޖޫން އާއި ހަމައަށެވެ. 15 ވަނަ ދުވަހު ރޯޑް ސޭފްޓީ ފެއަރއެއް ރަސްފަންނުގައި 4 ޖަހާއިރުން ފެށިގެން ކުރިޔަށްދާނެއެވެ. އަދި 17 ވަނަ ދުވަހުރޭގަނޑު 8:30 ގައި ފެކަލްޓީ އޮފް ހެލްތް ސައިންސަސްގައި މަގުމަތީގެ ސަލާމަތްތެރިކަމާއި ބެހޭގޮތުން ޕެނަލް ޑިސްކަޝަންއެއްވެސް ކުރިއަށްގެންދަން ވަނީ ހަމަޖެހިފައެވެ.
މި ހަނގާލުން ކުރިއަށް ގެންދިޔައީ އެޗް.ޕީ.އޭ އާއި ޕޮލިސް އަދި މޯލްޑިވްސް ރެޑް ކްރެސެންޓް ގުޅިގެން، ސޯޝަލް ސެންޓަރ އިންފެށިގެން އާޓިފިޝިއަލް ބީޗްއާއި ހަމައަށެވެ.
ލިޔުނީ: ސަފަނާ ޙަސަން
މީޑިއާ ކޯޑިނޭޓަރ، ހީލާރސް، އެމް.އެން.ޔޫ.އެސް.ޔޫ
