ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އިން ފެކަލްޓީ އޮފް ހެލްތު ސައިންސްގައި ގާއިމުކުރެވިފައިވާ ގޮފި ހީލަރސް އާއި ސްކޫލް އޮފް ނާރސިންގގައި ގާއިމުކުރެވިފައިވާ ގޮފި ނިއަރެސް އަދި ސްކޫލް އޮފް މެޑިސިންގައި ގާއިމުކުރެވިފައިވާ ގޮފި މެޑިކޯސް ގުޅިގެން ދުނިޔޭގެ ސިއްހަތު ދުވަސް ކުލަގަދަ ގޮތެއްގައި ފާހަގަ ކުރުމަށްޓަކައި ތަފާތު ހަރަކާތްތަކެއް ކުރިއަށް ގެންދިއުމަށް ނިންމައިފިއެވެ.
މިގޮތުން ކޮވިޑް 19ގެ މިހާލަތާ ގުޅޭ އަދި ވީހާވެސް ގިނަ ދަރިވަރުންނަށް ބައިވެރިވެވޭނެ ފަދަ ހަރަކާތްތަކެއް ކުރިއަށް ގެންދިއުމަށް އިސްކަން ދީފައިވާނޭ ކަމަށް ހީލާރސް ގެ ރައީސާ އައިމިނަތު ރައުދާ ވަނީ މައުލޫމާތު ދެއްވާފައެވެ. އަދި އަގުހުރި ގިނަ އިނާމުތަކެއް ވަނަ ވަނަ އަށް އަންނަ ފަރާތްތަކަށް ދިނުމަށް ރޭވިފައިވާކަން ވެސް ފާހަގަކުރެއްވިއެވެ.
”އަޅުގަނޑުމެން ހަރަކާތް ރޭވިއިރު ވަރަށް ބޮޑު އިސްކަމެއް ދިނިން ގިނަ ކުދިންނަށް ބައިވެރިވެވޭނެ ކަހަލަ ހަރަކާތްތަކެއް ކުރިއަށް ގެންދަން އަދި ކޮވިޑް 19ގެ މި ހާލަތާ ގުޅޭ ކަހަލަ ހަރަކާތްތަކެއް އިންތިޒާމް ކުރަން. މީގެއިތުރުން ފާހަގަ ކޮށްލަން ބޭނުން ވަރަށް އަގުހުރި އިނާމުތަކެއްވެސް ދިނުމަށް ހަމަޖެހިފަ ވަނީ“
– ފެކަލްޓީ އޮފް ހެލްތު ސައިންސްގެ ގޮފި ހީލާރސްގެ ރައީސާ އައިމިނަތު ރައުދާ މުހައްމަދު ރަޝީދު-
ސިއްހަތު ދުވަހުގެ ހަރަކާތްތަކުގެ ތެރޭގައި ހީލާރސް ގެ ފަރާތުން ”އެމް.އެން.ޔޫ.އެސް.ޔޫ ހީލާރސް ރަން“ ގެ ނަމުގައި މިމަހު 04 ފެށިގެން 06 ވަނަ ދުވަހުގެ ނިޔަލަށް ދުވުމެއް ކުރިއަށް ގެންދިއުމަށް ވަނީ ހަމަޖެހިފައެވެ. މި ދުވުމުގައި ބައިވެރިވާ ކޮންމެ ދަރިވަރަކަށް ވެސް ބައިވެރިވިކަމުގެ ސެޓްފިކެޓެއް ދިނުމަށް ވަނީ ހަމަޖެހިފައެވެ. އަދި 1 ވަނަ، 2 ވަނަ އަދި 3 ވަނަ އަށް ހޮވޭ ފަރާތްތަކަށް މެޑަލް ދިނުމަށް ވަނީ ހަމަޖެހިފައެވެ.
ނިއަރެސް އިން އިންތިޒާމް ކުރާ އިސްޓަގްރާމް ފޮޓޯ ޗެލެންޖް ވެސް މިމަހު 04 ފެށިގެން 06 ވަނަ ދުވަހުގެ ނިޔަލަށް ކުރިއަށްދާނެއެވެ. މި ޗެލެންޖްގައި ހޮވާނީ ސިއްހަތު ދުވަހުގެ ޝިއާރު ކަމުގައިވާ ”ބިލްޑިން އަ ފެއާރ، ހެލްތިއާރ ވޯލޑް“ އާ ގުޅޭ ގޮތުން ބައިވެރިން އިސްޓަގްރާމްގައި އާއްމު ކުރެވޭ ފޮޓޯ ތަކުގެ ތެރެއިން އާއްމުންގެ މެދުގައި އެންމެ މަގުބޫލް ފޮޓޯ އެވެ.
މެޑިކޯސް އިން ކުރިއަށް ގެންދާ ”ހެލްތް އެވެއާރނެސް ކުއިޒް“ ވެސް ހަމަ މި މުއްދަތުގައި ކުރިއަށްދާނެއެވެ. މި ކުއިޒަކީ ސިއްހަތާ ގުޅޭ އާއްމު މައުލޫމާތު ޔުނިވާރސިޓީގެ ދަރިވަރުންގެ މެދުގައި ހޭލުންތެރިކުރުމުގެ މަގްސަދުގައި ކުރިއަށް ގެންދެވޭ ކުއިޒެކެވެ. މި މުބާރާތުގެ ސުވާލުތައް ކޮންމެ ދުވަހަކުވެސް ސްކޫލު އޮފް މެޑިސިންގެ ގޮފި މެޑިކޯސްގެ ފޭސްބުކް ޕޭޖުގައި އާއްމުކުރެވޭނެއެވެ.
މީގެ އިތުރުން ސިއްހަތު ދުވަހާ ގުޅޭ ހާއްސަ ވީޑިއޯއެއް ތައްޔާރުކުރުމުގެ މަސައްކަތްވެސް މިހާރު ދަނީ ކުރެވެމުންނެވެ.
މިހުރިހާ ހަރަކާތެއްގައިވެސް ބައިވެރިވުމުގެ ފުރުސަތު ގައުމީ ޔުނިވާރސިޓީގައި ކިޔަވަމުންދާ ހުރިހާ ދަރިވަރުންނަށް ވެސް މިހާރު ވަނީ ހުޅުވާލާފައެވެ.
ހަރަކާތްތަކުގައި ބައިވެރިވުމަށް ކޮންމެ ދަރިވަރަކުވެސް ގޫގުލް ފޯމެއް ފުރަންޖެހޭނެއެވެ. އަދި ހަރަކާތްތަކުގެ ގަވާއިދާއި އުސޫލުތައް ކޮންމެ ގޮތްޕެއްގެ ފޭސްބްކު ޕޭޖް ގައި ފެންނަން ހުންނާނެއެވެ.
ސިއްހަތު ދުވަހުގެ މުނާސަބާތާ ގުޅުވައިގެން ކުރިއަށް ގެންދާ ހަރަކާތްތަކުގައި ވީހާވެސް ގިނަދަރިވަރުން ބައިވެރިވުމަކީ ހީލާރސް، ނިއަރެސް އަދި މެޑިކޯސްގެ ވަރަށް ބޮޑު އެދުމެކެވެ.
