ދުނިޔޭގެ ޞިއްޙަތު ދުވަސް ފާހަގަ ކުރުމުގެ ގޮތުން މެޑިކޯސް، ހީލާރސް އަދި ނިއަރެސް ގުޅިގެން ކުރިއަށް ގެންދިޔަ ހަރަކާތްތައް ނިންމާލައިފި!

ދުނިޔޭގެ ޞިއްޙަތު ދުވަސް ފާހަގަ ކުރުމުގެ ގޮތުން ދަރިވަރުންގެ ޔޫނިއަންގެ ޞިއްޙީ ދާއިރާއަށް ނިސްބަތްވާ 3 ގޮފި ކަމަށްވާ މެޑިކޯސް، ހީލާރސް އަދި ނިއަރެސް ގުޅިގެން ކުރިއަށް ގެންދިޔަ ހަރަކާތްތައް ނިންމާލައިފިއެވެެ.

އޭޕްރީލް 7 ގައި ފެކަލްޓީ އޮފް ހެލްތު ސައިންސަސް ހިންގާ އިމާރާތުގައި ރޭ ކުރިއަށް ދިޔަ ނިންމުމުގެ ރަސްމިއްޔާތުގައި ސްކޫލް އޮފް މެޑިސިންގގެ ޑީން ޑރ ޝީޒާ ޢަލީ، ސްކޫލް އޮފް ނާސިންގގެ ޑީން އަލްފަޞިލާ އާސިޔާ އިބްރާހިމް އަދި ފެކަލްޓީ އޮފް ހެލްތު ސައިންސަސްގެ ޑީން ޑރ. ފަޒީލާ ވަހީދުގެ އިތުރުން ދަރިވަރުންގެ ޔޫނިއަންގެ ރައީސް އަދި ނައިބު ރައީސް (ގޮފިތައް) ބައިވެރިވެލެއްވިއެވެ.

ޞިއްޙަތު ދުވަހާއި ގުޅުވައިގެން ހިންގުނު ހަރަކާތްތަކުގެ ތެރެއިން ހީލާސް އިން އިންތިޒާމުކުރި ”ހެލްތު ރަން“ އިން މުޙައްމަދު އަރުޝަމް އެއްވަނަ ހޯދައިފައިވާ އިރު، ދެވަނަ އަދި ތިންވަނަ ހޯދައިފައިވަނީ މުޙައްމަދު ޢަބްދުﷲ އަދި އަބްދުﷲ ޝަހުނީޒުއެވެ. މީގެ އިތުރުން މެޑިކޯސްއިން ކުރިއަށް ގެންދެވުނު ސުވާލު މުބާރާތުން އެންމެ ގިނަ ސުވާލުގެ ޖަވާބު ރަނގަޅުކުރި 3 ބައިވެރިންނަށް ވެސް ވަނީ އިނާމު ހަވާލު ކުރެވިފައެވެ. އަދި ނިއަރެސްއިން އިންސްޓަގުރާމް މެދުވެރިކޮށް ކުރިއަށް ގެންދިޔަ ”އިންސްޓަގްރާމް ފޮޓޯ ޗެލެންޖު“ ގެ އެންމެ މޮޅު ފޮޓޯއަކަށް 2141 ރިއެކްޓާއި އެކު ހޮވުނީ ރީޝަމް ޙުސައިން ހިއްޞާކޮށްފައިވާ ފޮޓޮއެވެ.

ދުނިޔޭގެ ޞިއްޙަތު ދުވަސް ފާހަގަ ކުރަނީ ކޮންމެ އަހަރެއްގެ ވެސް އޭޕްރީލް މަހުގެ 7 ވަނަ ދުވަހުއެވެ. ކޮންމެ އަހަރަކު ވެސް މި ދުވަހާއި ގުޅުވައިގެން ދުނިޔޭގެ ޞިއްޙަތު ޖަމްޢިއްޔާއިން ޝިއާރެއް ކަނޑައަޅާއިރު، މި އަހަރަށް ކަނޑައަޅާފައި ޝިއާރާކީ ”ހަމަހަމަ ކަމާއެކު ދުޅަހެޔޮ މުޖުތަމަޢެއް ބިނާކުރުމެވެ“.