އޮގަސްޓު އިންޓޭކުގައި އެފް.އެޗް.އެސް އާއި އަލަށް ގުޅުނު ދަރިވަރުންގެ އޮރިއެންޓޭޝަން ބާއްވައިފި

ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އަށް އޮގަސްޓް އިންޓޭކުގައި އަލަށް ގުޅުނު ދަރިވަރުންނަށް އޮރިއެންޓޭޝަން ބާއްވައިފިއެވެ.

އޮރިއެންޓޭޝަން ބާއްވައިފައިވަނީ އޮގަސްޓު 26 ވަނަ ދުވަހު ހެނދުނު އެފް.އެޗް.އެސްގެ އޮޑިޓޯރިއަމްގައެވެ.

ކޮވިޑް ގެ ހާލަތާ ގުޅިގެން މި އަހަރު ޖެނުއަރީ އިންޓޭކުގެ އޮރިއެންޓޭޝަން އޮންލައިން ކޮށް ބޭއްވިއިރު، މިފަހަރުގު އޮރިއެންޓޭޝަން ބާއްވާފައިވަނީ ފޭސް-ޓު-ފޭސް ކޮށެވެ. އެފް.އެޗް.އެސްގެ އެކިއެކި ކޯސްތަކަށް ގުޅުނު ގިނަ އަދަދެއްގެ ދަރިވަރުން ބައިވެރިވި މި އޮރިއެންޓޭޝަންގައި ފެކަލްޓީގެ ޑީންގެ އިތުރުން ފެކަލްޓީގެ އިސްވެރިންނާއި، ލެކްޗަރާއިން އަދި ހީލާރްސް ގެ ހިންގާ ކޮމެޓީގެ މެމްބަރުން ބައިވެރިވެފައިވެއެވެ.

މި އޮރިއެންޓޭޝަންގައި އަލަށް ގުޅުނު ދަރިވަރުންނަށް ވަނީ ހޫނު މަރުހަބާ އެއް ކިޔާފައެވެ. އަދި ފެކަލްޓީގެ އެކި ޑިޕާރޓްމެންޓުތަކުގެ ބޭފުޅުންގެ މައުލޫމަތާއި، ދަރިވަރުންނަށް ލިބެން ހުރި އެކިއެކި ހިދުމަތްތަކާއި ފުރުސަތުތައް އަދި އެފް.އެޗް.އެސް ގައި ހިންގާ ކޯސްތަކުގެ މައުލޫމާތު ވަނީ ދަރިވަރުންނަށް ހިއްސާ ކޮށްފައެވެ.

އަދި ކޮންމެ ލެކްޗަރާއެއްގެ ވާހަކާގައިވެސް ކިޔެވުމުގެ އިތުރުން  ޤައުމީ ޔުނިވަރސިޓީން ދަރުވަރުންނަށް ފަހި ކޮށްދެވޭ ހަރަކާތްތަކުގައި ބައިވެރިވުމާއި، ވަގުތު ގެ ބޭނުން އެންމެ ހެޔޮގޮތުގައިހިފައި ވަގުތު އޮށްވައި އެސައިމެންޓު ނިންމުމަށް ނަސޭހަތްތެރިވިއެވެ. މީގެއިތުރުން ދަރިވަރުންގެ އެޑްމިނިސްޓްރޭޝަންގެ ކަންކަމާއި، އެހެނިހެން ވެސް ދަރިވަރނުންނަށް ކުރިމަތި ވެދާނެ ދަތިތަކާއި، އިމްތިހާންގެ ކަންކަން އޮޅުން ފިލުވައިދިނުމުގެ ގޮތުން ވަނީ ކަހޫޓް ގެމް ކުރިއަށް ގެންގޮސްފައެވެ. މިގޭމުގެ މަގުސަދަކީ  އެކުވެރި މަޖާ މާހައުލެއްގައި ދަރިވަރުންނަށް ޔުނިވާރސިޓީ ހަޔާތުގައި ކުރިމަތި ވެދާނެ ގޮންޖެހުންތައް ހައްލުކުރާނެ މަގުދައްކައިދިނުމެވެ.

އެއަށްފަހު ދިވެހިރާއްޖޭގެ ގައުމީ ޔުނިވާރސިޓީގެ ދަރިވަރުންގެ ޔޫނިއަންގެ އެފް.އެޗް.އެސްގައި ގާއިމް ކުރެވިފައިވާ ގޮފި ހީލާރސްގެ ފަރާތުން ރައީސް އައިމިނަތު ރައުދާ މުހައްމަދު ރަޝީދު ވަނީ ދަރިވަރުންނާ ވާހަކަ ދައްކާފައެވެ. ރައުދާ ވަނީ ހީލާރސްގެ ހިންގާކޮމެޓީގެ މެމްބަރުންނާއި، ހީލާރސްގެ ތައާރަފެއް ދީފައެވެ. އަދި ހީލާރސްގެ ކުރިއަށް ރޭވިފައި ހުރި ހަރަކާތްތަކާއި، ލިބިފައިވާ ކާމިޔާބީތަކަށް ވެސް ރައުދާ ވަނީ އަލިއަޅުވާލައިފައެވެ. ހަމަ އެއާއެކު ހީލާރސްގެ ކޮންމެ ހަރަކާތްކައްގައިވެސް އެފް.އެޗް.އެސްގެ ކޮންމެ ދަރިވަރަކަށް ވެސް ބައިވެރިވެ އިސްކޮށް ހަރަކާތްތެރި ވުމުގެ ފުރުސަތު  އޮތްކަން ފާހަގަކުރިއެވެ.

އޮރިއެންޓޭޝަން ނިންމާލުމުގެ ގޮތުން ހީލާރސްގެ ފަރާތުން ވަނީ އައު ދަރިވަރުންގެ ބައިވެރިވުމާއެކު ކުޑަ ރޯލް ޕުލޭ އެއް ހުށައަޅާދީފައެވެ. އައު ދަރިވަރުން ކަންކަމުގައި އިސްނެގުމަށް ބާރުއެޅުމުގެ ގޮތުން މި ރޯލްޕްލޭއަށް އިސްނެގި ދަރިވަރުންނަށް ވަނީ އިނާމްވެސް ހަވާލުކޮށްފައެވެ. އަދި ހީލާރސްގެ ހިންގާކޮމެޓީގެ މެމްބަރުންގެ މިހާހިސާބަށް އައިރުގެ  ތަޖުރިބާތައް ވެސް ދަރިވަރުންނާ ވަނީ ހިއްސާ ކޮށްފައެވެ.

އަބަދުވެސް އެފް.އެޗް.އެސްގެ މިފަދަ ހަރަކާތްތަކުގައި ހީލާރސްގެ ފަރާތުން ބައިވެރިވެއެވެ. އަދި މިފަދަ ކޮންމެ ހަރަކާތެއް މިހާ ފުރިހަމަކޮށް ގެންދިއުމަށް ދަރިވަރުންގެ ޔޫނިއަންގެ ފަރާތުން ދެއްވާ ފުރިހަމަ އެއްބާރުލުން ފާހަގަކޮށްލަމެވެ.