ދިވެހިރާއްޖޭގެ ގައުމީ ޔުނިވާރސިޓީގެ ދަރިވަރުންގެ ޔޫނިއަންގެ ފަރާތުން ކޮންމެ އަހަރަކުވެސް ސިލްސިލާކޮށް ބާއްވަމުން އަންނަ އިންޓަ ފެކަލްޓީ ވޮލީ މުބާރާތުގައި ތިން އަހަރުގެ މެދުކެނޑުމަކަށްފަހު ފެކަލްޓީ އޮފް ހެލްތް ސައިންސަސްގެ ފިރިހެން ޓީމް ބައިވެރިވެއްޖެ އެވެ.
ވޭތުވެދިޔަ އަހަރުތަކުގައި އެފް.އެޗް.އެސްގެ ފިރިހެން ދަރިވަރުން ކުޅެފައިވަނީ ސްކޫލް އޮފް ނާރސިންގެ ޓީމާއެކުއެވެ. ނަމަވެސް ކޮންމެ އަހަރަކުވެސް އެފް.އެޗް.އެސް ގެ އަންހެން ވޮލީ ޓީމް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ މުބާރާތުގައި ބައިވެރިވެއެވެ.
މި މުބާރާތުގައި ބައިވެރިވުމަށް އެފް.އެޗް.އެސްގެ ދަރިވަރުންނަށް ހުޅުވާލި ފުރުސަތުގައި ބައިވެރިވި 25 އަށް ވުރެ ގިނަ ދަރިވަރުންނާއެކު، އެފް.އެޗް.އެސް އަށް އެކިފަހަރު މަތިން ކޯޗް ކަން ކޮށްދެއްވާފައިވާ ތަޖުރިބާކާރު ކޯޗު މައުމޫރު މުހައްމަދު (މަޓޭކޯޗް) ގެ އިރުޝާދުގެ ދަށުން ފަރިތަކުރުންތައް މިހިނގާ ސެޕްޓެމްބަރ 5 ވަނަ ދުވަހު ވަނީ ފަށާފައެވެ.
މިމުބާރާތަށް މުޅި އެފް،އެޗް،އެސް ތައްޔާރުވަމުން އަންނަ އިރު އަމާޒަކީ ދެ ޑިވިޝަނުގެ ފަޚުރުވެރި ޗެމްޕިއަންކަން އެފް.އެޗް.އެސްގެ ޓީމުތައް ކާމިޔާބުކުރުމެވެ.
ކުރީ އަހަރުތަކުގައިވެސް އެފް.އެޗް.އެސްގެ ޓީމުތަކަށް ކުޅުނު ފާހަގަކޮށްލެވޭ ކުޅުންތެރިންނާއި އެކު ޓީމުތަކުގެ ފަރިތަކުރުންތައް ޖޯޝާއި ފޯރީގައި ކުރަމުންދާއިރު އެފް.އެޗް،އެސްގެ ސަޕޯޓަރުން ވެސް އަންނަނީ މުބާރާތަށް އެހާމެ ފުރިހަމައަށް ތައްޔާރުވަމުންނެވެ.
