ފެބުރުވަރީ މަހުގެ 18 ވަނަ ދުވަހު ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އަށް އަލަށް ގުޅުނު ދަރިވަރުންނަށް ހާއްސަކޮށްގެން ކުރިއަށް ގެންދިޔަ ”ހީލާރސް ވެލްކަމް ނައިޓް 2022“ ކާމިޔާބުކަމާއެކު ނިންމާލައިފިއެވެ.
އެފް.އެޗް.އެސްގެ ހޯލުގައި ބޭއްވުނު މިހަރަކާތް ފެށިގެން ދިޔައީ ދަރިވަރުން އެކަކު އަނެކަކަށް ތައާރަފް ވުމަށް ކުޅެވުނު ހާއްސަ ކުޅިވަރުންނެވެ. އެކިއެކި ސަޕްރައިޒް ހަރަކާތްތަކާއެކު ތަފާތު ކުޅިވަރުތައް ދަރިވަރުންގެ މެދުގައި ކުޅެވިގެންދިޔައެވެ.
ދަރިވަރުން ގިނަ ހަރަކާތްތަކުގައި ބައިވެރިވެ، ދަރިވަރުންގެ ހުނަރު އިތުރު ކުރުމަށް ހީލާރސް ގެ ރައީސާ ހަސްނާ ވިޝާމް ނަސޭހަތްތެރިވެފައިވެއެވެ. އަދި ދަރިވަރުންނަށް ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން ފަހިކޮށްދޭ ފުރުސަތު ތަކުގެ ބޭނުން ހެޔޮގޮތުގައި ހިފުމުގެ މުހިންމުކަން ވެސް ފާހަގަ ކުރެއްވިއެވެ.
މި ހަރަކާތުގައި މިއަހަރުގެ ފެބުރުވަރީ އިންޓޭކުގައި އެފް.އެޗް.އެސް އަށް އަލަށް ގުޅުނު 45ށް ވުރެން ގިނަ ދަރިވަރުން ބައިވެރިވެފައިވާއިރު، ހީލާރސްގެ ހިންގާކޮމިޓީ މެމްބަރުންގެ އިތުރުން ހީލާރސްގެ ގިނަ މެމްބަރުން ބައިވެރިވެފައިވެއެވެ. އަދި ހީލާރސް ގެ ކުރީގެ ހިންގާ ކޮމިޓީތަކުގެ މެމްބަރުން ބައިވެރިވުމަކީ މި ނައިޓު އިތުރަށް ފުރިހަމަވެގެންދިޔަ ސަބަބެކެވެ.
މީގެ އިތުރުން އެފް.އެޗް.އެސްގެ ޑީން ފަޒީލާ ވަހީދާއި އެފް.އެޗް.އެސްގެ މެނޭޖުމެންޓްގެ ބައެއް ބޭފުޅުން ބައިވެރިވެފައިވާއިރު، ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ހިންގާ ކޮމިޓީގެ މެމްބަރުން ވެސް ބައިވެރިވެފައިވެއެވެ.
ހީލާރސްގެ ފަރާތުން ހިންގާ މިފަދަ ހަރަކާތްތަކުގެ މައިގަނޑު މަގުސަދަކީ ވީހާވެސް ގިނަ ދަރިވަރުންގެ ބައިވެރިވުމާއެކު ހުރިހާ ކުދިންގެ މެދުގައިވެސް ބަދަހި ގުޅުމެއް އާލާކުރުމެވެ.
