”ހީލާރސް މޫވީ ނައިޓް“ ތިން އަހަރުގެ މެދުކެނޑުމަކަށް ފަހު 04 މާރިޗުވީ ހުކުރު ދުވަހު ބާއްވައިފިއެވެ.
މި ހަރަކާތް ކުރިއަށް ދިޔައީ ފެކަލްޓީ އޮފް ހެލްތް ސައިންސަސްގެ އޮޑިޓޯރިއަމްގައެވެ. މިފަހަރުގެ ހީލާރސް މޫވީ ނައިޓް މުޅިން ތަފާތުކޮށްލުމުގެ ގޮތުން އަޅުވާފައިވަނީ މިފަހުން ނިކުތް މަޝްހޫރު ކާޓޫނެއް ކަމުގައިވާ “ އެންކާންޓޯ“ އެވެ. މިއީ ގޮތްޕަކުން ބޭއްވި މޫވީ ނައިޓެއްގައި ކާޓޫނެއް އެޅުވި ފުރަތަމަ ފަހަރެވެ. މީގެ އިތުރުން ހީލާރސްގެ ފަރާތުން ވަނީ ބެލުންތެރިންނަށް ފޮޓޯ ނެގުމަށް ހާއްސަ ކޮށް މޫވީގެ ތީމާއި ގުޅޭގޮތުން ފޮޓޯ ބޫތެއް ތައްޔާރުކޮށްފައެވެ. އަދި މިފަހަރުގެ ފުޑް ސްޓޯލް ހާއްސަކުރެވިފައި ވަނީ ޕޮޕްކޯނަށްކަމުން އެކި ރަހަ ތަކުގެ ޕޮޕްކޯން ވަނީ ވިއްކާފައެވެ.
ގައުމީ ޔުނިވާރސިޓީގެ ހުރިހާ ދަރިވަރުންނަށް ހާއްސަކޮށް ކުރިއަށް ގެންދިޔަ މިހަރަކާތް އިންތިޒާމުކޮށް މިހާ ފުރިހަމަ ކަމާއެކު ނިންމާލުމުގައި ހީލާރސްގެ ލީޑަރުންވަނީ އިސްރޯލެއް އަދާކޮށްފައެވެ.
މިހަރަކާތުގެ މައިގަނޑު މަގުސަދަކީ ހީލާރސްގެ ފަރާތުން މިއަހަރު ކުރިއަށް ރޭވިފައި ހުރި އެކިއެކި ހަރަކާތްތަކަށް ބަޖެޓް ހޯދުމެވެ. އަދި ދަރިވަރުންނަށް ޔުނިވާރސިޓީ ހަޔާތަކީ އުފާވެރި ހަނދާންތަކަކާއެކީ ހޭދަކުރެވޭ ދުވަސްތަކަކަށް ހެދުމުގެ ފުރުސަތުތަށް ތަނަވަސް ކޮށްދިނުމެވެ.
ހީލާރސްގެ މިފަހަރުގެ މޫވީ ނައިޓަށް ވެސް ވަނީ ދަރިވަރުންގެ ފަރާތުން ހީނުކުރާ ވަރުގެ ތަރުހީބެއް ލިބިފައެވެ.
ކުރިއަށް އޮތް ތަނުގައިވެސް ތަފާތު އައު ކަމަކާއެކު މޫވީ ނައިޓްތައް އަދި އެނޫން ވެސް ފަންޑު ރައިޒިން ހަރަކާތްތައް ކުރިއަށް ގެންދިއުމަށް ހީލާރސް އިން ވަނީ ރާވާފައެވެ.
