ދިވެހިރާއްޖޭގެ ގައުމީ ޔުނިވާރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން ކޮންމެ އަހަރަކުވެސް ބާއްވަމުން އަންނަ އިންޓަރ ފެކަލްޓީ ވޮލީ ބޯޅަ މުބާރާތުގައި ބައިވެރިވާ ފެކަލްޓީ އޮފް ހެލްތު ސައިންސަސް (އެފް.އެޗް.އެސް)ގެ ޓީމް ތަކަށް ޖާޒީ ހަވާލުކޮށްފިއެވެ.
ކޮންމެ އަހަރަކުވެސް އެފް.އެޗް.އެސް އަންހެން ވޮލީ ޓީމް މި މުބާރާތުގައި ބައިވެރިވާއިރު، އަހަރުތަކެއްގެ މެދުކެނޑުމަކަށް ފަހު އެފް.އެޗް.އެސް ގެ ފިރިހެން ވޮލީ ޓީމް ވަނީ ފާއިތުވި އަހަރު މި މުބާރާތުގައި ބައިވެރިވެފައެވެ. މިފަހަރުގެ މުބާރާތުގައިވެސް އެފް.އެޗް.އެސްގެ އަންހެން އަދި ފިރިހެން ޓީމް ވަނީ ބައިވެރިވެފައެވެ.
10 މާރޗް ވީ ބުރާސްފަތި ދުވަހު އެފް.އެޗް.އެސް ގައި ބޭއްވި މިރަސްމިއްޔާތުގައި އެފް.އެޗް.އެސް ގެ ޑީން އާއި ލެކްޗަރާއިން އަދި ހީލާރސްގެ ހިންގާ ކޮމެޓީގެ މެމްބަރުންނާއި، ދެ ޓީމްގެ ކުޅުންތެރިން ވަނީ ބައިވެރިވެފައެވެ.
މިރަސްމިއްޔާތުގައި އެފް.އެޗް.އެސްގެ ޑީން ޑރ ފަޒީލާ ވަޙިދް ވަނީ ކުޅުންތެރިންނަށް ހިތްވަރު ދެއްވާ، އެފް.އެޗް.އެސް ގެ މެނޭޖްމެންޓުގެ ފަރާތުން އެފް.އެޗް.އެސްގެ ވޮލީ ޓީމަށް ފުރިހަމަ އެއްބާރުލުން ލިބޭނެކަމަށް ވިދާޅުވިއެވެ.
މިއަހަރުގެ އެފް.އެޗް.އެސްގެ ވޮލީ ޓީމް ވަނީ މުބާރާތަށް ވަރަށް ފުރިހަމަ އަށް ތައްޔާރުވެފައެވެ. ދެ ޓީމްގެ ވެސް އަމާޒަކީ ޗެމްޕިއަންކަން ހޯދުމެވެ.
