ސިއްހަތު ދުވަހުގެ ހަރަކާތްތަކާ ގުޅޭ ގޮތުން މަޝްވަރާކުރުމަށް ހީލާރސް، ނިއަރެސް އަދި މެޑިކޯސްގެ ފަރާތުން މާރޗް 30 ވަނަ ދުވަހު އެފް.އެޗް.އެސް ގައި ބޭއްވި ބައްދަލުވުމުގައި ވަނީ މިއަހަރުގެ ދުނިޔޭގެ ސިއްހަތު ދުވަސް ތިން ގޮފި ގުޅިގެން ފާހަގަ ކުރުމަށް ނިންމާފައެވެ.
ތިން ގޮފި ގުޅިގެން އެންމެ ފުރަތަމަ ސިއްހަތު ދުވަސް ފާހަގަ ކޮށްފައިވަނީ 2021 ވަނަ އަހަރެވެ. ފާއިތުވި އަހަރު ކުރިއަށް ގެންދެވުނު ހަރަކާތްތަކަށް ބަލާއިރު އެމް.އެންޔޫ.އެސް.ޔޫ ހީލާރސް ރަން، ނިއަރެސް އިން އިންތިޒާމް ކުރި ފޮޓޯ ޗެލެންޖް އަދި މެޑިކޯސް އެވެއާރނެސް އޮންލައިން ކުއިޒް ހިމެނެއެވެ. ކޮވިޑް19 ގެ ސަބަބުން ގޮންޖެހުންތަކާއެކު ކޮވިޑްގެ ހާލަތާ ގުޅޭ ގޮތަށް ބައްޓަން ކުރެވިގެން ކުރިއަށް ގެންދެވުނު މިހަރަކާތްތަކަށް ވަނީ ގިނަ ދަރިވަރުންގެ އެއްބާރުލުން ލިބިފައެވެ.
ފާއިތުވި އަހަރުގެ ތަޖުރިބާއަށް ބަލައި މިއަހަރުވެސް ކުރިން އިންތިޒާމް ކުރެވުނު ބައެއް ހަރަކާތްތައް ކުދި ބަދަލުތަކަކާއެކު ކުރިއަށް ގެންދިއުމަށްވަނީ ރޭވިފައެވެ. އެގޮތުން ”އެމް.އެން.ޔޫ.އެސް.ޔޫ ހީލާރސް ރަން“ މިއަހަރުވެސް ކުރިއަންގެންދިއުމަށް ހަމަޖެހިފައިވާއިރު، މެޑިކޯސްގެ ފަރާތުން އޮންލައިންކޮށް ކުރިއަށް ގެންދެވުނު ސުވާލު މުބާރާތް މިފަހަރު “ ދަ ރައިޓް ގެސް“ ގެ ނަމުގައި ކުރިއަށްގެންދިޔުމަށް ހަމަޖެހިފައިވަނީ ނިއަރެސްގެ ފަރާތުންނެވެ.
ސިއްހަތު ދުވަހުގެ ހަރަކާތްތަކުގެ ތެރެއިން ސްކޫލް އޮފް މެޑިސިންގެ ގޮފި މެޑިކޯސް ގެ ފަރާތުން އިންތިޒާމުކުރާ “ ހެލްތް އެންޑް ފަން“ ހަވީރު ހުކުރުދުވަހުގެ ހަވީރު 03.00 ން 05.00 ށް ސޯޝިއަލް ސެންޓަރގައި ކުރިއަށްދާނެއެވެ. މިހަރަކާތުގައި ކުޑަކުދިންނަށް ހާއްސަ ސްޓޯލުތަކާއި، ހަކުރު ބެލުމާއި، ލޭގެ ޕްރެޝާރ ، ބަރުދަނާއި އިސްކޮޅު އަދި ކައުންސިލިން ދިނުމަށް ހާއްސަ ސްޓޯލްތައް ހިމެނެއެވެ. މިހަރަކާތަކީ އާއްމުންނަށް ހުޅުވާލައިގެން ކުރިއަށްގެންދެވޭ ހަރަކާތެކެވެ.
ފެކަލްޓީ އޮފް ހެލްތް ސައިންސަސްގެ ގޮފި ހީލާރސްގެ ފަރާތުން ކުރިއަށްގެންދާ ”އެމް.އެން.ޔޫ.އެސް.ޔޫ ހީލާރސް ރަން“ މިމަހު 7 ފެށިގެން 9 ވަނަ ދުވަހުގެ ނިޔަލަށް ކުރިއަށް ގެންދިއުމަށް ވަނީ ހަމަޖެހިފައެވެ. ކުރިން އަހަރު އެންމެ އަވަހަށް ދުވުން ނިންމި 3 ފަރާތަކަށް މެޑަލް ދިން ނަމަވެސް، މިފަހަރު ތަފާތު ކޮށްލުމުގެ ގޮތުން ދުވުން ނިންމާ ފުރަތަމަ 5 ބައިވެރިންނަށް މެޑަލް ދެވޭނެއެވެ. އަދި ބައިވެރިވާ ކޮންމެ ފަރާތަކަށްވެސް ބައިވެރިވިކަމުގެ ސެޓްފިކެޓް ދެވޭނެއެވެ. މިދުވުމުގައި ބައިވެރިވުމުގެ ފުރުސަތު ޤައުމީ ޔުނިވާރސިޓީގެ ހުރިހާ ދަރިވަރުންނާއި، ލެކްޗަރާއިން އަދި މުއައްޒަފުންނަށް ވަނީ ހުޅުވާލައިފައެވެ. ދުވުމުގައި ބައިވެރިވުމަށް ކޮންމެ ބޭފުޅަކުވެސް ގޫގުލް ފޯރމެއް ފުރަންޖެހޭނެއެވެ. މިފޯރމާއި ދުވުމުގެ ގަވާއިދާއި، އުސޫލުތައް ހީލާރސް ފޭސްބުކު ޕޭޖުގައި ފެންނަން ހުންނާނެއެވެ.
ސްކޫލް އޮފް ނާރސިންގެ ގޮފި ނިއަރެސްގެ ފަރާތުން އިންތިޒާމްކުރާ “ ދަ ރައިޓް ގެސް“ ސުވާލު މުބާރާތް 09 އޭޕްރީލް ވާ ހޮނިހިރު ދުވަހު އެފް.އީ އޮޑިޓޯރިއަމްގައި ކުރިއަށް ގެންދިއުމަށް ރޭވިފައިވާއިރު، މި މުބާރާތުގައި ބައިވެރިވުމުގެ ފުރުސަތު މިހާރުވަނީ ހުޅުވާލައިފައެވެ. މިސުވާލު މުބާރާތުގައި ހިމެނޭނީ މިއަހަރުގެ ސިއްހަތު ދުވަހުގެ ޝިޢާރާ ގުޅޭ ސުވާލުތަކާއި، ސިއްހަތާ ގުޅޭ އާއްމު މައުލޫމާތުގެ ސުވާލުތަކެވެ. މި މުބާރާތް ކުރިއަށްގެންދިއުމަށް ހަމަޖެހިފައިވަނީ އިންޓަ ފެކަލްޓީ މުބާރާތެއްގެ ގޮތުގައިކަމުން، ކޮންމެ ފެކަލްޓީ އަކުންވެސް ބައިވެރި ކުރެވޭނީ 6 ކުދިންގެ އެއް ގުރޫޕެވެ. ޖުމުލަ 4 ބުރަކަށް ބަހާލައިގެން ކުރިއަށް ގެންދާ މިސުވާލު މުބާރާތް ކުރިއަށް ދަނީ ކޮންމެ ބުރަކުންވެސް އެންމެ ދަށް މާރކްސް ލިބޭ ޓީމެއް މުބާރާތުން ކަޓާ އުސޫލުގެ މަތިންނެވެ. އަދި ފައިނަލްގައި ބައްދަލު ކުރާނީ ހުރިހާ ބުރަކުން އެންމެ މަތިން މާކްސް ލިބޭ 2 ޓީމެވެ. މި މުބާރާތުން މޮޅުވާ ޓީމަކަށް ގިފްޓް ހެމްޕާ އެއް ލިބިގެންދާނެއެވެ. އަދި ބައިވެރިވާ ޓީމްތަކަށް ސެޓްފިކެޓް ދެވޭނެއެވެ.
މީގެއިތުރުން އާއްމުން ހޭލުންތެރި ކުރުމަށްޓަކައި މިއަހަރުގެ ދުނިޔޭގެ ސިއްހަތު ދުވަހުގެ ޝިޢާރު ކަމުގައިވާ “ ހެލްތީ ޕްލެނެޓް، ހެލްތީ ލައިފް “ އާ ގުޅޭގޮތުން ތަފާތު މައުލުމާތުތައް ހިމެނޭ ޕޯސްޓާރސް ކޮންމެ ގޮތްޕެއްގެވެސް ފޭސްބުކް ޕޭޖުން އާއްމުކުރެވިގެންދާނެއެވެ.
ދުނިޔޭގެ ސިއްހަތުދުވަހުގެ މުނާސަބަތާ ގުޅުވައިގެން ކުރިއަށް ގެންދާ ހަރަކާތްތަކުގައި ވީހާވެސް ގިނަ ދަރިވަރުން ބައިވެރިވުމަކީ ހީލާރސް، ނިއަރެސް އަދި މެޑިކޯސްގެ ވަރަށް ބޮޑު އެދުމެކެވެ.
ސިއްހަތު ދުވަހާއި ގުޅިގެން ބާއްވާ ހާއްސަ ޖަލްސާ އާއި ދުވަހާއި ގުޅިގެން ކުރިއަށްގެންދެވުނު އެކިއެކި ހަރަކާތްތަކުގެ ނަތީޖާ ފާޅުކުރުން 09 މާރޗް ވާ ހޮނިހިރު ދުވަހުގެ ރޭ ބޭއްވުމަށް ވަނީ ހަމަޖެހިފައެވެ.
