ކޮންސޯޓިއަމް އޮފް މެޑިކަލް ސްޓޫޑަންޓްސް (މެޑިކޯސް) އިން މޯލްޑިވިއަން ބްލަޑް ސާރވިސެސްއާއެކު ސިލްސިލާ ކޮށް ކުރިއަށްގެންދާ ލޭ ހަދިޔާ ކުރުމުގެ ހަރަކާތުގެ ދެވަނަ ބުރު ހީލާރސްއާ ގުޅިގެން ކުރިއަށް ގެންގޮސްފިއެވެ.
06 އޮގަސްޓް 2022 ވީ ހޮނިހިރު ދުވަހުގެ ހެނދުނު 10:00 އިން ހަވީރު 16:30 އަށް މޯލްޑިވިއަން ބްލަޑް ސާރވިސަސްގައި ބޭއްވުނު ލޭ ހަދިޔާ ކުރުމުގެ މި ކެމްޕެއިނަކީ ހީލާރސްގެ ފަރާތުން މިއަހަރު ބައިވެރިވި މިފަދަ ފުރަތަމަ ކެމްޕެއިނެވެ.
ދިވެހިރާއްޖޭގެ ގައުމީ ޔުނިވާރސިޓީގެ ދަރިވަރުންނާއި މުވައްޒަފުންނަށް އަމާޒުކޮށްގެން 2022ވަނަ އަހަރުގެ މާރިޗްމަހު ”ރޯލް އަޕް ޔުއަރ ސްލީވްސް، ސޭވް އަ ލައިފް“ ގެ ނަމުގައި ފެށިގެންދިޔަ މި ހަރަކާތުގެ ދެވަނަ ބުރު ކުރިއަށް ގެންދެވިފައިވަނީ އާންމުންނަށް ވެސް ބައިވެރިވެވޭގޮތަށް ހުޅުވާލައިގެންކަން ފާހަގަކޮށްލެވެއެވެ. އެގޮތުން މި އަހަރުގެ ލޭހަދިޔާ ކުރުމުގެ ދެވަނަ ބުރުގައި ޖުމްލަ 37 ބޭފުޅަކު ލޭ ހަދިޔާކުރެއްވުމަށް ޝައުޤުވެރިވެވަޑައިގެން ހަރަކާތުގައި ބައިވެރިވެފައިވާއިރު ޖުމްލަ 23 ބޭފުޅަކު ވަނީ ލޭ ހަދިޔާކޮށްފައެވެ. މި ހަރަކާތުގެ ތެރެއިން މިހާތަނަށް މުޅި ޖުމްލަ 19 ލީޓަރުގެ ލޭ ހަދިޔާކުރެވިފައިވާއިރު މި އަދަދަކީ ލެއަށް ބޭނުންޖެހިފައިވާ 129 މީހުންގެ ފުރާނަ ސަލާމަތްކުރުމަށް އެކަށޭނަ މިންވަރެއްކަމަށް މެޑިކޯސްއިން މައުލޫމާތުދެއެވެ.
ދިވެހިރާއްޖެއަކީ ނިސްބަތުން ލޭއަޅާ ކުދިން ގިނަ ޤައުމަކަށްވެފައި ދުޅަހެޔޮ ސިއްހަތެއްގައި ހުރެ ތިމާގެ ލެއަކީ އަނެކާއަށް ރައްކާތެރި ލެއެއްކަމުގައި ދެކިލައްވާ ކޮންމެ ބޭފުޅަކުވެސް ލޭ ހަދިޔާކުރުމަކީ މެޑިކޯސްގެ ވަރަށްބޮޑު އެދުމެކެވެ.
ކޮންމެ ބޭފުޅަކުވެސް ލޭ ހަދިޔާ ކުރުމަށް ވަޑައިގަންނަވާ ނަމަ ސަމާލުކަން ދޭންޖެހޭނެ އެންމެ މުހިންމު ކަންކަމަކީ ލޭ ހަދިޔާކުރުމުގެ ކުރިން މަދުވެގެން 6 ގަޑި އިރުގެ ނިދި ފުރިހަމަ ކުރެއްވުމާއި ލޭ ހަދިޔާކުރުމަށް ވަޑައިގަތުމުގެ ކުރިން ރަނގަޅަށް ކޭންބެއްލެވުމެވެ. މީގެ އިތުރުން ލޭ ހަދިޔާ ކުރެވޭނީ ލޭގައި އޮކްސިޖަން ހަރުލައްވާ މާއްދާ ކަމަށްވާ ހިމޯގްލޯބިން އަދި ލޭގެ ޕްރެޝަރު ރަނގަޅު ބޭފުޅުންނަށެވެ.
ލޭ ހަދިޔާ ކުރުމަށް ކުރިއަށް ގެންދާ މިކެމްޕެއިންގެ މައިގަނޑު މަގުސަދަކީ ޤައުމީ ޔުނިވަރސިޓީގެ ވީހާވެސް ގިނަ ދަރިވަރުންނާއި މުވައްޒަފުން އަދި އާންމުން ލޭ ހަދިޔާ ކުރުމަށް ހޭލުންތެރިކުރުމާއި، ޤަވާއިދުން ލޭ ހަދިޔާކުރެއްވުމަށް ހިތްވަރުދިނުމެވެ. އަދި ލޭ ލިބުމުގެ ދަތިކަމަށް ހައްލު ހޯދައިދިނުމެވެ. މި ސިލްސިލާ ހަރަކާތުގެ ތިންވަނަ ބުރު އަންނަ ނޮވެމްބަރ މަހު ބޭއްވުމަށް މެޑިކޯސްއާއި ހީލާރސްއިން ވަނީ ނިންމާފައެވެ.
